India in Myanmar-ah chhawmdawl hna a thawk zel

Operation Brahma hnuaia India in Myanmar-a lirnghing tuarte a tanpuina tur Lengpui thlawhna tumhmuna a rawn phurh thlen chu kar kalta Nilaini khan truck hmangin Zokhawthar-ah phurh thlen a ni.

Operation Brahma tia vuah Lirnghing avanga chhiatna hrang hrang thleng leh inchhan-chhuahna hna thawhna tura India sipaite hmalakna hi thla liamta March ni 29 khan bultan a ni a, he hmalakna ah hian India mithiam hrang hrang damdawi lam leh lirnghing sawhkhawk tuar te sawngbawl tura mithiam bik te chuan Myanmar rama lirnghing tuar te an enkawl dawn a, heng bakah hian India sawrkar chuan Myanmar-ah hian tanpuina thahnem tak thlawhna leh lawng hmangin a thawnlut bawk a ni.

He hmalakna hnuaiah hian India chuan United State siam sipai thlawhna, Indian Air Force ta C-17 Globemaster hmangin metric tonne 65 zeta rit mipui mamawh hrang hrang chu April 1, 2025 khan Lengpui tumhmun-ah a rawn phur a, heng a rawn phurh te hi tui intur, buhfai, damdawi, mut bu te leh inenkawlna atana mamawh hrang hrang te an ni a, kar kalta Nilaini khan heng tanpuina tur hrang hrang hi Assam Rifles truck hmangin Zokhawthar lamah phurh thlen an ni a, heta tang hian Myanmar ramah lakchhawn leh a ni ang. Chin State-a mipui sipai hruaitute chuan lirnghing tanpuina tur chu dodal an tum lo tih sawiin, an mi leh sa te an inhrilh lawk vek tawh thu leh tluang takin tanpui ngai te hnen thlentir an duh tih an sawi a ni.