Hna hmu mi 153 awm thu sawi

Mizoram Youth Commission (MYC) Chairman Malsawmzuala Ralte chuan kum khat chhunga MYC hmalaknaa Mizo thalai hna hmu mi 153 an awm thu a sawi.

MYC hmalakna hrang hrang sawia nimin-a thuthar thehdarhtute a kawmna ah MYC Chairman chuan heng thalai hna hmu thar zinga sawrkar hna hmu thar chu 33 an nih thu a sawi a. Nikum February thla atanga ZPM sawrkar thar hnuaia MYC hmalakna hrang hrang tarlangin, kum 2024-2025 chhungin Aizawl, Lunglei, Siaha, Champhai leh Kolasib-a an Coaching Centre-ah zirlai mi 588 an neih thu a sawi a. MYC, Honda CSR leh Visan Foundation te nena tanhona hnuaiah Hospitality Sector-a training Course thawhkhatna zo tawh mi 122 zinga mi 97 in Hotel hrang hrang hna an hmuh thu a sawi a, British Army dilna mi 247 an thehluh sak tawh thu leh heng mite zinga visa hmu fel tawh mi 5 chu UK-a assessment ti tura an thlen tawh thu a sawi a. Visa result nghak mek mi 4 awm bawkin British sipaia tan tum te hi Mizo tlangval British Army-a thawk mek ten an lo buaipui thin thu a sawi a ni.

MYC Chairman chuan MYC leh The Lalit Group, New Delhi thawhdunna hnuaiah Spa Therapy training dil mi 100 atangin mi 7 thlan an nih thu leh training an neih mek thu a sawi a. Sri City Employment programme hnuaiah Mizo thalai mi 8 hnathawk tura thlahliam an nih thu leh Cabin Crew/Air Hostess interview hmachhawn tur Mizo nula 104 te tuaihriamna hun, Grooming Session hmanpui an nih tawh thu a sawi a. Heng baka an hmalaknaa hna hrang hrang thawk tura intuaihriam leh hmundang hrang hranga hna thawk tura thlah liam an nih thu a sawi bawk. 

MYC Chairman chuan sawrkar atanga an Budget neih chu hmalak tak tak nan a beitham thu sawiin, hetihrual hian kawng hrang hrang an hmalakna tura sum hmuh theih dan tur an dap zel thu a sawi bawk.