Mizoram Lokayukta in thubuai 77 ziaklut tawhin heng zinga 55 te chu chhui lailawkna zawhfel a ni tawh

Mizoram Lokayukta chuan a din tirh tangin thubuai 77 ziaklut tawhin chhui lailawk (Preliminary Enquiry) 55 a nei tawh a, heng zinga 26 te chu chhui zui a ni tawh a. Thubuai thehluttu (Complainant) in a hming leh nihna thup a duh a nih pawhin a hming leh nihna thupsak tlat tur a nih thu an sawi.

Mizoram Lokayukta hian mipuite hnenah an hnathawh leh hmalakna te puangzarin kum 2019-a din a nih hnuah Mizoram Lokayukta-ah hian thubuai 77 ziahluh a nih tawh thu hi an tarlang a, heng zingah hian chhui lailawk (Preliminary Enquiry) 55 neih ni tawh bawkin heng complaint chhui lailawk (Preliminary Inquiry) atang hian chhui puitlin tawh (Investigation) 26 an neih tawh thu an sawi bawk a ni. Mizoram Lokayukta chuan thubuai thehluttute leh eiru nia puhna complaint a zirchianna (examination and hearing) atangin complaint 30 chu tihtawp ni tawhin, Department thuneitute hnenah Departmental proceeding ti tura thupek case 4 (pali) a awm thu an sawi bawk a ni.

Mizoram Lokayukta chu Mizoram Lokayukta Act 2014 hnuaia din niin March 11, 2019 khan Chairperson hmasa ber C. Lalsawta IAS (Rtd) hnuaiah dan angin Mizoram Lokayukta Office hi hawn a ni tih pawh sawiin, Mizoram Lokayukta hi State sawrkar lak atanga inrelbawlna leh hnathawh dan hrang nei a nih avangin eiruk leh hlemhletna do tura din (Independent anti-corruption body) a ni tih an sawi a. Tun dinhmunah Mizoram Lokayukta ah hian Lalmalsawma IAS (Rtd), Chairperson leh Member pahnih (2) awmin Full body in hna a thawk mek tih an sawi a. Thawktu (staff) 28 awm mekin a tih changtlun zawk nan thawktu dang lak belh tura hmalak bakah hnuchhuitu hran (Inquiry Wing) pawh nei tura chak taka kalpui mek a ni tih an sawi bawk.

Mizoram Lokayukta chuan eirukna thubuai thehluh hi lehkha phek a ziakin an Office-ah Pisa kai hunchhungin thehluh theih a ni tih sawiin, email hmangin mizoramlokayukta@gmail.com emaw mizoram.lokayukta@mizoram.gov.in ah thehluh theih a ni bawk. Tunhnaiah hming awm lo leh thubuai thehluttute biakpawh theih loh a awm thin tih sawiin, hei hian thu zawh belh ngai leh complaint kal zel dan hriattir turin thubuai kalpui chhunzawm zel a harsa thin tih an sawi a. Complaint ah hian thubuai thehluttu (Complainant) in a hming leh biakpawh theihna chiang taka ziakin thubuai thehluttu in a hming leh nihna thup a duh a nih pawhin thupsak tlat tur a ni tih an sawi bawk.