Health Minister in Kulikawn Damdawi In a tlawh

Health Minister Lalrinpuii chuan nimin khan khum 50 awmna Kulikawn Hospital tlawhin Hospital building thar sakna tur atan ruahmanna a awm mek chungin, tuna a nihna ang anga mipuite tana tangkai zawka service an pek theih dan turte a enpui.

Health Minister hi Medical Superintendent Dr. James RE Mawia leh a thawhpui ten lo dawngsawngin, tun dinhmun ah chuan MUHCS beneficiary 30 an enkawl tawh a, Bed occupancy hi a tlangpuiin 52% vel anih bakah Mizoram=a Psychiatry Ward nei awmchhun an nih avangin Psychiatry Bed 24 te chu a khat deuh reng thu an sawi. 

Health Minister Lalrinpuii chuan Pathian tanpuina azarah mipuite harsatna chhawk zangkhai tura Sawrkar scheme thar, Mipui Healthcare chu a hlawhtling chho zel tih sawiin, April 1 atanga April 14 thleng khan mi 153 an refer tawh bawk tih a sawi a, Hmun hrang hranga PHC/CHC leh District Hospital hrang hrang leh ZMC&H thawktuten mipui tan theihtawp an chhuah ve zel tih sawiin, Kulikawn Hospital thawktute pawh tan la lehzual turin a fuih a, A bikin Nurse te chu damlo te tawngtai sak mai bakah, tawngtai pui tam turin a chah bawk. Kulikawn Hospital ah hian Naupang lam Doctor tha tak a awm mek bakah, Medicine Doctor tha tak a awm thar a, Hmeichhe lam Doctor tha tak awm bakah Dental Doctor 4 lai an awm mek a, heng Doctor thiam tak tak te hi mipuite pawhin tun aia nasa zawkin pan se a duhthu Minister chuan a sawi bawk.