Tawng hlutzia hre thar zel turin zirlaite fuih

Art & Culture Minister C. Lalsawivunga chuan Zirlaite chu Mizo tawng hlutzia leh hman dik a pawimawhzia te hre thar zel turin a chah.

SCERT leh Mizo Language Development Board tangkawpin pawl 5 atanga pawl 8 zirlaite tana ‘Thawnthu tawi inziahsiak’ an buatsaih lawmman semna nimin-a ATI Auditorium-a an buatsaih a hmanpuina ah Art & Culture Minister chuan tawng chu hnam tin nunphunga bet tlat, hnam ro hlu berte zing a mi a nih thu a sawi a. Thangthar ten Mizo tawng pawimawh zia an hriatchian lehzual theihna tur leh, tawnghmang dik zawkte an zir chhoh theihna tura SCERT leh MLDB-te hmalakna chu ropui a tih thu a sawi a, Zirlaite chu Mizo tawng hlutzia leh hman dik a pawimawhzia te hre thar zel turin a chah nghal a. Mizo thalaite zingah tunlai hian tawnghmang dik hlel deuhte leh hawrawp mumal lo tak taka ziak te a hluar deuh a ngaih theih a ni tih sawiin, inzirtir kan uar sauh sauh a tul thu a sawi bawk.

He intihsiakna ah hian Zonunkimi (Dinthar, Aizawl), English Congregation School, Mission Veng chu pakhatna niin Lalzarzovi (E. Damdiai), Damdiai Upper Primary School chu pahnihna leh Lalliansiami (Chhinga Veng), Aizawl Govt. ChhingaVeng M/S chu pathumna an ni.