International Women’s Day pualin Serchhip-ah hun hmang

Inrinni kalta March 8, 2025-a 'International Women’s Day' denchhenin nimin khan Serchhip Kawnpui VC Hall-ah Hmeichhiate dikna chanvo inhrilhhriatna hun hman a ni.
One Stop Centre Serchhip District leh Women & Child Development Serchhip District te tangkawp in an buatsaih he hun hman hi Lalvensanga, District Mission Coordinator chuan kaihhruaiin District Coordinator James Lalremliana chuan inlawmna thu a sawi a, Serchhip One-Stop Centre-a Centre Administrator Lalchhanhimi chuan One Stop Centre kalphung leh an hnathawh dan te sawifiahin hmeichhia ten hleilenna chi hrang hrang an tawh thin leh hemi laka Dan in chanvo a pek te a sawifiah a, Lalrinngheti, Resident Superintendent, Shakti Sadan hnen atangin hmeichhia humsual daite tana sawrkar ruahmanna sawi ngaihthlak a ni bawk.

He hunah hian Serchhip District-a hmeichhia te zinga hmingtha thlanchhuah mi pahnih te hnenah chawimawina hlan niin Hmeichhe Serchhip District-a Journalist awmchhun leh hmasa ber, Serkhawpui Daily Newspaper-a Editor leh Hmeichhe VC Member lo ni tawh H. Lalbiakzauvi, Serchhip Bazar Veng hnenah leh kum 1984 Govt. Serchhip College-a English Lecturer hna lo thawk tawh leh Serchhip District-a Hmeichhia Ph.D Doctorate dawng hmasaber, Lehkhabu 17 lai lo ziak tawh Prof. C Sangluaii te hnenah Thuziak an hlan bawk a ni.

He hunah hian MHIP Sub-Hqrs. President Lianthangi chuan tunlai khawvela hmeichhia te pawimawhna leh an phak tawk theuhah mite tana malsawmna ni tura MHIP memberte fuihna thuchah ngaihthlak a ni bawk.

‘International Women’s Day 2025’ pual vek hian nimin chawhnu lam khan Govt. Serchhip College-ah Resource Person atana Dr. Lalnunpuii Asst Professor hmangin ‘In Mizo Culture : Retrospect and Challenges’ tih thupui a hmangin 'Seminar Programme' hman a ni bawk.