Mizoram-a zu khapna Dan siamthatna tur Bill eptu Member te tel lovin pawm a ni

Mizoram-a Zu khapna Dan hman mek siamthatna tur, The Mizoram Liquor (Prohibition) Amendment Bill, 2025 chu nimin-a Mizoram Assembly thutkhawm ah pass a ni a, he Bill puluttu Excise & Narcotics Minister Lalnghinglova Hmar chuan Zu khapna dan siam thatna chu zu phalraina tur Bill ni lovin kuthnathawktute lamtang Bill a nih thu a sawi.

Mizoram Legislative Assembly Budget Session nimin-a chhunzawm ah Mizoram-a Zu khapna Dan hman mek siam thatna tur, The Mizoram Liquor (Prohibition) Amendment Bill, 2025 chu pulutin sawiho a ni a, he Bill puluttu, Excise & Narcotics Minister Lalnghinglova Hmar chuan Bill thar chuan sawilawk a hlawh nasa hle tih sawiin, Bill thar atanga sum lut tur awm mahse, Chhiah tam tak lak theihna tur a awm lova, hei vang hian sawrkar chuan sum siamna tur leh vote zawn nana tih a ni lo tih sawiin, “Kuthnathawktute lamtang Bill a ni,” a ti.

Minister chuan Bill thar chu Excise Department-a thawktute tan hah phahna tur ni mahse kuthnathawktute tan hlawkna tur a ni dawn tih sawiin, Zu khapna dan hman mekah chuan Champhai leh Hnahthial Winery atanga siam Grape Wine chauh siam phalsak a nih avangin thei dang chingtute a huam lo tih a sawi a, Bill thar chuan thei dang atanga Wine siam pawh a phalsak dawn avangin kuthnathawktu thei chingtute duhsakna a ni dawn tih a sawi a. Hetihlai hian Kohhran lamin Bill putru an lo hmuh atanga tih loh an duh thu a hnena an thlen chu ZPM Legislature Party chuan March ni 1 khan ngaihtuahin, Zupui leh Zu tuitling chu an paih leh ta tih a sawi a, hei bakah hian Zufang siam phalna pawh an paih tel tih sawiin, Bill tharin a phalsak tur chin chu sawrkar hmasa in a lo duan tawh ang tho, Grape Wine siam phalna, Alchohol zaa 10 aia sang lo chu Grape bakah thei dang chi hrang hrang hmanga Wine siam phal a ni tawh dawn ti a sawi a ni.

Hei bakah hian Excise & Narcotics Department changtu Minister chuan tualchhung siam Beer siam phalna duan tel a nih thu pawh sawiin, hetihlai hian Bill thar chuan State pawn atanga Wine leh Beer lakluh a khap dawn bakah a Sen Chi leh Rakzu te a khuahkhirh dawn tih a sawi a, tuna MLP Act hman mek chuan Autonomous District 3- Mara, Lai leh Chakma Autonomous District Council te a huam lova, tuna an Bill putluh hi chuan Mizoram pum a huam tawh dawn tih sawiin, Autonomous District 3-ah te pawh hian Sap Zu leh Rakzu te chu khap vek a ni dawn tih a sawi a, hemi chungchangah Member te atanga a duhlo an awm avangin Autonomous District Council a hman ve tumna erawh ennawn theih a ni ang tih a sawi bawk.

House chhunga Bill pharh a nih hnu hian sawihona neih zui nghal niin Member 23 in House chhungah an ngaihdan an sawi a, Assembly Speaker Lalbiakzama chuan he Bill he House chhunga chai hlawh ber pawl a ni tih sawiin, Member te ngaihdan Vote hmanga lak a nih dawnin Eptu Member te chu House atangin an chhuak a, hei vang hian he Bill hi eptu member te tel lovin House chuan a pawm a ni.

Eptu hruaitu leh MNF Member Lalchhan-dama Ralte chuan, Zu khap bur an duh laia Zu zawrhna tur bilh luhna Bill chu an pass pui thei lo tih sawiin, MNF Member te hi House atangin an chhuak a, BJP MLA Dr. K. Beichhua pawhin Dan thar zehluh ah Excise and Narcotics Department in Special Permission nei ho chunga Zu a zuar tur chu an pawm thei lo a tih he hunah hian a sawi bawk a ni.

House Leader Lalduhoma chuan Member ten House an chhuahsan chu pawi a tih thu sawiin, Bill lungrual taka pass theih an duh thu leh Eptu lamin an duhlo a nih pawhin ‘duh lo’ an ti mai turah a ngai tih a sawi a, he Bill hi Zu zawrh phalna ah ngaihsak luiin puh lui tlat mahse Zoram mipui ten an pawmpui theih a beisei tih a sawi bawk.