Khawlailung PHC tan Bialtu MLA in Ambulance a hlan

Hrangturzo Bialtu MLA leh Adviser to Chief Minister Lalmuanpuia Punte chuan a bial chhung Khawlailung Primary Health Center-a hman turin Ambulance a hlan a, nimin khan Khawlailung PHCaiawhin Medical Officer Dr. Vanlalhruaii a dawng a ni.
Old Secretariat Building-a Ambulance inhlanna puala hun hman ah Hrangturzo Bialtu MLA Lalmuanpuia Punte chuan hmasawnna chak takin kalpui duh mah i la harsatna neuh neuh lo awm ve thin tih sawiin, a tahtawlin mipui mamawh leh kuthnathawktute khaichhuak turin Chief Minister thahnemngaihna in tih hlawhtlin chhoh mek zel a ni tih a sawi a. Khawlailung PHC hian tehna paltlang ngai 'IPA' a tlin theihna tur atan Ambulance an mamawh tih sawiin, chumi avanga pek an nih thu a sawi a. Hrangturzo bial mipui pawhin a zar an zo zel ang tih sawiin, “Mi ngaih ah chuan thil ropui tak nilo mahse mipui mamawhna anga hma laknaah sawrkar nen tangkawpin a zar kan la zo zel pawh ka beisei bawk a ni,” a ti.

He hunah hian Health and Family Welfare Department changtu Commissioner leh Secretary H. Lalengmawia pawhin Hrangturzo Bialtu MLA in a bial chhung mamawh inthlahrung tak chunga a hlan chu ropui a tih thu sawiin, “Mizoram sawrkar hian hriselna hi a ngai pawimawh em em a, chung ang hmalakna hmuh theh a ni pawh hi lawma-wm ka ti hle a ni. Mizoram leh Central in Healthcare system tha tak kan neih te hi a hlawhtlinna tur chuan sawrkar Hospital mai ni lo mimal Hospital pawimawhna te pawh hi a sang zel dawn a ni,” a ti a. “Thil tha min tihsaktute chungah lawmna chang hria i la, finchhuah zel bawk i la, thil tha titute chawimawi hi Pathian duh dan pawh a niin ka hria,” a ti bawk.