BJP in Karthar Inhlanna leh Political Session nei

BJP Mizoram Pradesh chuan nimin khan Aizawl-a BJP Office-ah Karthar Inhlanna leh Political Session neiin he hunah hian Speaker hlui Lalrinliana Sailo chuan thu a sawi a, “Political Party tinte hian Pathian thu tha lai leh Politics hi kan chawhpawlh mah mah niin a lang a, Pathian thu hi chu Pathian thuin kal se, Kristian kan nih angin kan Politics kalkawng hruaitu ah hmang thung ila, Pathian hming a naranin lam suh tih Bible ah kan hmuh angin a nazawnga Politics leh Pathian thu chawhpawlh lutuk lohva, mipuite leh Pathian hmaa kan thutiamte kan tihhlawhtlin zawk hi chunglam Malsawm dawnna pawimawh tak a nih ka ring a ni,” a ti a. Mizoram Youth Commission Bill chungchang sawiin, “Ammendment form-a kal tur a ni a, tun Session kal mek ah MYC Repeal Bill kan hmu kha a zialo hle a, MYC hming hi an la hmang duh a nih chuan Amendment Form a ni tur a ni. Repeal ni si a, MYC hming an la hmang tho hi a zia lo hle a, Repeal a nih chuan MYC hi thai bo a ni tur a ni,” a ti bawk.