Sik leh sa leh boruak inthlakin hriselna a nghawng dan chungchang zirhona neih a ni

Sik leh sa leh boruak inthlakin hriselna a nghawng dan chungchang leh hemi laka invenna tur leh boruak/leilung tichhe lo tura tih tur hrang hrangte inzirtirna hun chu nimin khan Aizawl-a DHME Conference Hall-ah neih a ni.

National Health Mission hnuaia National Programme on Climate Change and Human Health (NPCCHH) buatsaih Aizawl East leh Aizawl West District huamchhunga Health & Wellness Centre hrang hranga Health & Wellness Officer-te leh Medical Officer (AYUSH) te tana ‘Training of Trainer on Climate Change and Human Health’ hi National Health Mission (NHM) Mizoram-a Mission Director Dr. Eric Zomawia chuan hmanpuiin Health & Wellness Officer-te taima tak leh rim taka mipui tana hna an thawhnaah lawmthu a sawi a. NHM nihphung leh hnathawh hrang hrangte sawifiahin, NHM chu mi zawng zawng banphak a nih thu leh mitin chhawr theih tur leh man tlawm zawka inenkawlna tha zawk siam kawnga hmalatu a nih thu a sawi a. Hospital hrang hranga a thlawna inenkawlna tam zawk a awm theih nana hmalak a nih thu leh Mizorama Damdawi In hrang hrang 19 te India rama damdawi In tha bikah thlan an nih tawh thu sawiin, Sub-Centres, Health & Wellness Centre, Primary Health Centre, Community Health Centre leh Urban Primary Health Centre-te Hospital lian zawk pan ngai lova changtlung zawk leh tha zawka thuam that anih thu a sawi a. Thawktute chu ram leh mipuite tana theihtawp chhuaha taima leh rinawm taka thawk zel turin a fuih bawk a ni. 

He hun hi NPCCHH-a State Nodal Officer Dr. Vanlalrengpuia Chinzah chuan kaihruaiin leilung, sik leh sa inthlakin mipui hriselna a nghawng nasat dante tarlangin, Climate Change (Sik leh sa inthlak) hi a awm ngei a, sawrkar hnathawkte chauh ni lovin mipuite’n tangruala kan hmachhawn tur thil pawimawh tak a nih thu a sawi a. Sawrkar Hospital leh inchhungkhura boruak chhia chi hrang hrang siam theite ti tlem tur zawnga hmalakte, tawih theilo bawlhhlawh leh vawi khat hman plastic-te ti tlem tura hmalak a ngaih zia te a sawi bawk.

Nimin-a he hun hman ah hian NPCCHH-a District Nodal Officer Dr. Walter Lalnuntluanga Sailo leh NHM-a State Programme Manager Dr. B. Lalthantluanga te chuan Climate change chungchang zirtirin, Rosie Zosangkimi, State Consultant, NPCCHH in hmalak dan leh hnathawh dan chungchang a sawi a. Heng bakah hian Health Department-a mithiam hrang hrangte'n zirtina pein Training chhimtu Health & Wellness Officer leh Medical Officer-te hian anmahni Centre theuha ASHA leh Jan Arogya Samiti (JAS) member-te training an pe chhawng ve leh dawn a ni.