MNF in ZPM paihthla turin Mizo mipuite an ngen

MNF Publicity Department chuan February ni 12-a Village Council leh Local Council inthlanpui neih turah mipuite duhthlanna rapbettu ZPM paihthla turin Mizo mipuite an ngen tih an sawi.

Nimin-a Aizawl Press Club-a thuthar thehdarhtute an kawmnaah MNF General Secretary leh Legal Board Secretary ni bawk David R. Lalsawmtluanga chuan Champhai leh Khawzawl District-ah ringawt VC panga- Ngur, Hnahlan, Thekpui, Zawlsei leh Sialhawk VC-te awm tha hle hle lai an namthlu ringawt nia sawiin, an sawrkar tuk lawkah Ngur VC an thiat a, mipui Court-ah ZPM sawrkar duh dan takin September ni 24, 2024 khan By-election hmanga fiah niin, itsikna nena an thiah tak MNF Party tho chuan mipui khawngaihna dawngin hnehna sang tak neiin VC an siam tawh tih a sawi a. VC pathumte chu High Court-ah an zualko thu leh Gauhati High Court, Aizawl Bench chuan Jan. 27, 2025 khan Hnahlan leh Thekpui VC chungchang ngaihtuahin an thiah dan chu Principles of Natural Justice kalh a ni tih High Court chuan sawiin, a sut niin a sawi.

Hei bakah hian Sialhawk VC chungchang pawh September ni 4, 2024 khan High Court chuan thutlukna a siam nghal bawk tih sawiin, ZPM sawrkarin a suspend-na chu a thiah sak leh bawk a, an hnathawh chhunzawm lehnghal tura hma la turin sawrkar a hriattir tih a sawi bawk.

MNF General Secretary chuan niminpiah khan FCS&CA Department lamin Ration Card-ah e-KYC ti vek tur leh February ni 28, 2025 ralhma ngei ngeia ti hman lo te chu Ration Card atanga paih vek tura Mizo mipuite min vau zui chu paw an ti em em bawk tih a sawi a, VC leh LC inthlan buai nen, kum tawp exam lai ni bawk nen, zirlai nei chhungkua zawng zawng leh inthlanna buaipuitute tan phurrit nasa tak leh invauna Order an siam chu vanduai thlak an tih thu a sawi a ni.