LADC-ah CEM bangin sawrkar thar din tum a ni

Lai Autonomous District Council (LADC)-a Chief Executive Member (CEM) nilai C. Lalmuanthanga chuan nimin khan CEM atanga a ban thu House-ah a puang a, LADC-a sawrkar dinglai chu a tluin sawrkar thar din tum a ni ang.

Mipui thlan MDC 25 awmna LADC-ah hian Congress leh MNF Party-ten United Legislature Party dinin thla riat leh tlem sawrkarna an chelh hnuah ZPM Legislature Party chuan LADC-a sawrkar dinglai in thlawptu a ngah tawk lo tih Larsap hnena an thlen hnuah Larsap ruahmanna angin nimin chawhma dar 10:30 khan LADC Emergency Session koh a ni a, Floor Test neih tura tih ni mah se CEM-in a ban thu a puan avang leh sawrkar dinglai a tlu tih a sawi avangin Floor test pawh nei lovin Session hi tihtawp a ni zui ta a ni.

LADC-a Chairman VL. Hmuaka chuan LADC-ah hian sawrkar thar din leh turin Larsap hnenah sawrkar din theih thu thlen a tul dawn thu a sawi a, United Legislature Party atanga ZPM thlawptu Elected Member pahnih V. Zirsanga leh Lallawmsanga Apetow te chuan niminpiah khan MNF Party atanga banna an thehlut a. Nimin vek khan ZPM Legislature Party chuan an hruaitu tur thlanna neiin MNF atanga ZPM zawmtu V. Zirsanga chu Leader atan an thlang a, Deputy Leader-ah Manghmunga Chinzah leh Secretary-ah LR. Dingliana Chinzah te an thlan bakah Treasurer atan BN. Thangpuia te an thlang a, ZPM Legislature Party hian MDC 25-ah MDC 13 an neiin Larsap hnenah sawrkar an siam theih thu hi an thlen dawn a ni.