Political party hrang hrang hruaitu ten VC/LC Inthlanpui-ah Vote an thlak

Mizoram District 9-a Village Council leh Local Council inthlan chu nimin khan neih a ni a, Political party hrang hrang hruaitute pawhin Vote hi an thlak a ni.

Chief Minister Lalduhoma chuan nimin chawhma lam khan an Veng, Aizawl Chawlhhmun Polling Station-ah Vote hi thlakin an party-in hnehna an chan a beisei thu a sawi a. VC leh LC term sawrkarin a pawh tawi chungchanga thuthar thehdarhtute zawhna chhangin, an party-in thatpuina tur emaw, chhiatpuina tur emaw a awm a rin loh thu a sawi a. Inthlanna buatsaih chungchang ah hun a chep deuh hlek a, amaherawh chu Election Commission lamte an tang a, an felfai thawkhat nia a hriat thu sawiin, inthlanna felfai taka buatsaihtu State Election Commission chungah lawmthu a sawi a, Polling Station hrang hranga duty zawng zawng te, vote chhiara duty tur te, venhimna hna thawktute chungah leh khua leh tui tha an nihzia tilanga vote thlaktu zawng zawng te chungah lawmthu a sawi bawk.

MNF President Zoramthanga chuan Aizawl Ramhlun Venglai Polling Station-ah nimin khan Vote hi thlakin, inthlanna felfai tak tluang taka neih anih a beisei thu a sawi a, MNF in seat tam tham tak lak an beisei tih sawiin, rorellai ZPM chu hun reilote an sawrkar hnuah mipuiin an rorelna hnuaia kun hrehawm an ti tih a sawi a, opposition lamah awm mahse MNF chuan seat tam tak an lak a rin thu a sawi bawk a. VC term pawt tawia inthlan a ngai chu thil fello a awm tih sawiin, hun lo awm zelah sawrkar la awm tur ten VC term tih danglam a hlauhthawnawm tih a sawi a, nakin zelah thil pawi zawk ala thleng thei tih a sawi bawk.

MPCC President Lal Thanzara pawhin nimin vek khan Zarkawt Polling Station=ah vote thlakin mipui tam thei ang ber vote thlak turin a ngen thu a sawi a, ZPM sawrkar chu an intiam angin an awmlo tih sawiin, Congress sawrkar laia ram rohlu alo siam tawh hralh turin hma a la thin niin a sawi a, an intiam anga an awmloh dan hre reng chunga vote thlak turin Mizo mipuite a ngen tih a sawi bawk a ni.

Nimin-a Village Council Inthlanpui hi Mizoram-a Village Council Inthlanpui vawi 21-na District hrang hranga Village Council 544-ah inthlanna hi neih a ni a, Aizawl Municipal Corporation huamchhunga Local Council 87 leh Lunglei Municipal Council huamchhunga Local Council 24-ah inthlanna hi neih ni bawkin AMC hnuaia Local Council inthlan vawi lina a ni a, Lunglei Municipality huamchhunga Local Council-te tan chuan Local Council anga Inthlanpui neih tum khatna a ni thung.