Unaute thlavang hauh ngam lo sawrkar niin sawi

MNF General Hqrs. a National Core Committee Member Tawnluia chuan India sawrkar laka unaute thlavang pawh hauh ngam lo sawrkar kan hrawn chu pawi a tih thu a sawi.

MNF Party in Aizawl Mizo Hna Run-a Chhung Inkhawm nimin-a an neih ah National Core Committee Member Tawnluia chuan ZPM sawrkar chu India lakah meikhup in an awm nia sawiin, “Kan Bawm unau nunau nena Mizoram rawn lut tawh 28 pawh Mizoram sawrkar leh Assam Rifle ten tunhnai lawk khan an nawrlet leh a ni,” a ti a. “Kan unaute thlavang hauh inti ve siin a tak takin engmah an ti tak tak ngam lo a, meikhupin an awm. CM ber pawhin, ‘Central thuneihna do ngawt chi a ni lo’ a ti a. Sawrkar hmasa leh CM hmasa hmalakna leh tun sawrkar-in kan unaute thlavang a hauh dan chu a inang lo hle a ni. India sawrkar laka unaute thlavang pawh hauh ngam lo sawrkar kan hrawn hi a pawi hle,” a ti.

ZPM Sawrkar chuan sum enkawl an thiam loh vangin Financial Crisis an hmachhawn mek nia sawiin Tawnluia chuan, “Tuna an dinhmun chu BJP Minister pek nge Zu zawrh tih a ni deuh maiin a lang. Sum an puk awk awk thin te, Oil man an tihsan te, buhfai man nasa taka an tihpun te, Chhiah an tihpun te hi eng atan nge an hman? Sum leh pai enkawl danah an hlawhchhan chiang hle a ni,” a ti bawk.