Sawhthing lei ngei tura an duhsak thu sawi

MPCC President Lal Thanzara chuan Kuthnathawktute hmakhua ngaihtuahin sawrkar in Sawhthing lei ngei se an duhsak thu a sawi.

Nimin a MPCC in Aizawl Congress Bhavan-a Political Session an neih ah an President Lal Thanzara chuan kan sawrkar hrawn mek chuan nikum January leh December inkar khan vbc. 3393 a puk nia sawiin, “He sawrkar hian vbc. sang thum chuang ba nei chung hian mipui laka an tiam Sawhthing lei te, bana kaih te an puitlin theiin kan ring em?” a ti a. “Zo khua kuthna-thawktu ten an lo ring tawh sia, keini min sawichhe thiam si a, anmahni a inghatin Sawhthing mi tam takin an ching a, an han thar mah anga hetiang leiba nei chung hian an lei thei a nih chuan zokhua kuthnathawktute an lawmpuiawm takzet an,” a ti a. ‘Lei thei lo se, mualpho se tih chu politics-ah chuan thil awm thei a ni tih pawh sawiin, “Kuthnathawktute hmakhua ngaihtuah hian leithei ngei se kan duhsakna a ni,” a ti.

Mizoram Political party-ah Congress tluka sawi tur nei tha an awm loh thu MPCC President chuan sawi bawkin, “Remna leh muanna kan nei ringawt te hi a ropui em em a, tuna thalai tam zawk hi khatih hunlaia hun harsatzia hre lo te an ni,” a ti a. Mizoram politics chu thil tam tak a awm lem lo tih sawiin, “Vawiin a Ruling te hi an chet that vak kan ring lo, BJP pawisa an hmang a, an BJP tak tak ngam si lova, an BJP tak tak ngam hun rual rualin an chhiatna huna lo thleng dawn a ni,” a ti bawk.