Kuthnathawktute ban-ah kaiin khaichhuah ngei tum

Chief Minister Lalduhoma chuan kuthnathawktute an banah kai in an khai chhuak ngei dawn tih a sawi.

Aizawl South-II ZPM ten nimin a Block Conference an neih a hmanpuina ah Chief Minister Lalduhoma chuan nikum-ah Hmunphiah bikah agreement an ziahpui Company in an ti mualpho hle nia sawiin, “Kumin ah erawh Empanelled Firm 7 te nen agreement kan ziak a, Hmunphiah ro hi an lei zo vek thei lo a nih chuan sawrkarin a lei anga, Home hrang hranga awm ttalaite hnathawh tur kan siam sak dawn a ni,” a ti. Chief Minister chuan an sawrkar tuk atangin beih an tawk nghal nia sawiin, “Thil tha kan tih te hmu thei lovin sawiselna tur an zawng nasa hle, ‘In Sawhthing lei kan ba lo’ ti tute ngeiin Kuthna-thawktute kan han ngaihsak chu min beihna an zawng leh si a, thil tha kan ti ang tih hi an hlau em em a, mahse kan ram tan hian thil tha tih kan thulh dawn chuang lova, kuthnathawktute an ban-ah kaiin kan khaichhuak ngei dawn a ni,” a ti.

Chief Minister chuan Sawhthing chawh hun runpui kan la thleng lo tih sawiin, “Kuthnathawktute hmakhaw ngaiin a to hun kan nghahpui hret a, kan lo sawi tawh chu tihhlawhtlin ngei kan tum a ni. Ram mipuite hian min beiseina leh min tehna a sang bik a, tun sawrkar mekah hian buklung han khai chhin ula, sawrkar laka lungawi lo nia in hriatte chu mimal hamthatna um an ni zel ang. A him chin leh a mawi chinah te chuan party mite kan inhre ve ang, amaherawh chu mimal hamthatna duh lutuk avanga innawr vak vak te hi a tha lova, ZPM in ram siam kan tum dan nen pawh a inpersan hle a ni,” a ti a. “Party leh sawrkar ti mualpho khawpa hnathawk chhia, ram hmangaihna nei lo, hlep hnem tum ringawt kan awm a nih chuan party atang pawhin kan inchawlh tir hreh dawn lo,” a ti bawk.