Thenzawl-a AH&Vety Department ram chu tun aia chhawr tangkai tura hmalak zel tum a ni
Thenzawl-a AH&Vety Farm a tlawhna ah hian Animal Husbandry & Veterinary Minister C. Lalsawivunga chuan Thenzawl-ah hian acres 769-a zau ram an nei tih sawiin, a bul lo tantu te leh lo enkawltu mi hmasate a fak a. Ranvulhtute pawhin he lai hmun hi an chhawr tangkai hle tih sawiin, “Hhei aia an chhawr tangkaina tur hian hma kan la zel dawn a ni,” a ti a. Tin 57-a zau ranchaw hmun chu sawrkar hmalakna in kum 2024-ah chuan Tin 70 hmun siam belhin Tin 127 hmun zet a zau ranchaw siamna hmun an nei tawh tih Vety Minister chuan sawiin, Ranchaw hi a ro (dry) hralhchhuah theih tura peihfel a nih tawh thu leh Kg. 1,50,000 zet tharchhuah theih beisei a nih thu a sawi a. Ranvulhtute awlsam zawk nan ranchaw hi Thenzawl atangin Selesih AH&Vety Farm-ah lak phei dan ngaihtuah mek a nih thu a sawi bawk.
Vety Minister hian Zo-Sial humhalhna tur atana din Sial Farm hmunhma tlawhin hmathar lakna hrang hrang a enfiah bawk a, Mizo Sial leh Zo Vawk a ral mai lohna tura thawktuten an lo vulh chu thil lawmawm tak a ni, a ti a. He Sial Farm ah hian tun dinhmunah Zo-Sial pariat vulh mek a ni a, ti pung zel tura hmalak mek a nih thu a sawi a. Artui kan intodelh theih nan hma an la mek tih pawh sawiin, “Kumin atanga bul tan turin Arpui a tui tam chi nuai khat vulh theihna turin hma kan la mek a, a hmun hma tur pawh kan nei tha a, thawktu kan nei tha bawk, Mizoram in bung thar kan kai ngei dawn a ni,” a ti a. Sial vulhtute tan Sial Chi liah tur Rashtrya Gokul Mission (RGM) atangin siam mek a nih thu leh hei pawh hi an tih changtlun zel theih chuan Sial vulhtuten an tangkaipui hle dawn thu a sawi bawk.
AH&Vety Minister hian Vety Department Kel vulhna hmun leh Vety Dilpui te pawh a tlawh bawk a. Thenzawl-a AH&Vety Department hmunhma tha tak an neih hi tangkai taka hman a nih theih nana ruahmanna hrang hrang kalpui mek a nih thu a sawi bawk. Minister hi AH&Vety Department Addl. Director Sahlu Khaila leh thawktu dang ten an tawiawm a ni.
Comments
Post a Comment