Serchhip District-a RO turte tan Traning neih a ni

Village Council Inthlanpui neih hun tur puan a nih rualin Serchhip District-ah pawh Inthlanpui neih tur atan hian inbuatsaihna chak taka kalpui mek a ni.
State Election Commission in Village Council Inthlanpui neih hun tur a puan hnuah Ser-chhip District chhung VC Area hrang hranga Returning Officer te chuan nimin khan anmahni Bial theuh ah VC Inthlan hriatirna hi an tichhuak ve nghal a, Serchhip District Election Officer Paul L. Khuma pawhin inthlan chungchanga hriattirna tichhuakin Serchhip District chhungah Model Code of Conduct hman tan nghal tur a nih thu leh hei hian inthlan result puan thleng a huam thu a tarlang bawk a ni.


Serchhip District-a VC Inthlanpui neih tura Village Council hrang hranga Returning Officer (RO) leh Asst. Returning Officer (ARO) tura ruat te tan nimin khan Serchhip Bawrhsap Pisapui Hall-ah Training neih a ni a, he hunah hian Serchhip Election Officer F. Lalnisai chuan kalkhawm te zirtirna pein Inthlanpui neih hun tur puan a nih rualin RO te chuan an hna an thawh tan nghal a tul dawn thu leh Inthlanpui zawhfel thlenga hna thawk tur an nih avangin an thil zir te chu ngai pawi-mawh turin a chah a. VC Area hrang hranga RO leh ARO tura ruat te chu Inthlanna felfai leh thianghlim tak a awm theihna tura theihtawp chhuah turin a chah bawk a ni.

Tun tuma Village Council Inthlanpui neih turah hian Serchhip District-a VC 56-ah Inthlanna hi neih a ni dawn a, heng VC Area tinah hian Returning Officer (RO) tur mi pakhat theuh ruat niin VC Area pakhat-a Polling Station pakhat aia tam awmna, Khawlailung, Thenzawl West leh Thenzawl East-ah te chuan Asst. Returning Officer (ARO) mi pakhat theuh ruat belh an ni bawk a. Heng mite tan hian he Training hi neih niin RO te hriat tur pawimawh hrang hrang hrilhfiah an nih bakah Inthlan buaipuina tura an bungraw mamawh te pawh pekchhuah nghal an ni bawk.

Comments