Births & Deaths Certificate pekchhuah te thla thar atangin Digitized vek-a kalpui a ni dawn

Sawrkar in ruahmanna a siam angin thla thar February 2025 atang chuan Birth Certificate leh Death Certificate pekchhuah te chu Digitized tur niin tuna pekchhuah thin kut ziak-a Certificate te chu chu pek a ni tawh lo ang.
He thu hi Serchhip District chhunga Registrar of Birth & Deaths te tana kumtin-a an hnathawh dan chungchanga hriat tur pawimawh inzirtirna hun, kumin 2025 atana nimin-a Serchhip DRO Conference Hall-a neih ah tarlan a ni a, he hunah hian Serchhip-a District Research Officer (DRO) Lalthangmawia chuan sawrkar in Birth Certificate leh Deaths Certificate a pekchhuah thin chu Ditized vek a ni tawh dawn tih sawiin, tuna Manual-a pekchhuah thin chu kalpui zui a nih dawn loh thu leh heng Certificate te pawh hi chhut thar a ni tawh lo tih a sawi a. Hei bakah hian a hun-a Birth Certificate leh Death Certificate la lo ten a hnu-a man chawia DRO Office-a an lak thin te pawh khua leh Veng tina Registrar of Birth & Deaths te hnena lachhuak thei tawh tura ruahman a nih thu a sawi bawk a ni.

Serchhip District-a RBD te tana Training hi Serchhip District Bawrhsap leh District Registrar of Births & Deaths Paul L. Khuma chuan hmanpuiin a hawng a, he huna tel RBD te chu Registrar hna chu an hna pui ber ni lovin an hna penhleh zawk ni mah se an hna chu hmangaihna nen hlut taka mipuite tana thawk turin a chah a. An hna an hlut a nih chuan an thlir dan pawh a danglam dawn thu leh chu chuan hmasawnna a thlen dawn thu sawiin, “Hmangaihna leh chhan neia hna kan thawh chuan Pathian leh kan mihringpui te nen inzawmna tha kan nei thin,” a ti a ni.

Bawrhsap chuan Registrar of Births & Deaths te pawimawhna tarlangin, mi a lo pian a lo chhinchhiah chu khua leh tui an nihna anga an chanvo an channa hmasa ber a ni tih sawiin, Data dik tak neih chuan ram leh khawtlang tana ruahmanna (Plan) siam kawngah pawh nasa taka a puih theih thu a sawi a, Nau piang hlim te dik taka lo chhinchhiah chuan Electoral Roll siam thlenga a nghawng theih avang leh hei hian chanvo tam tak a pek nghal theih avanga fimkhur a tul thu a sawi a. Kan ramah rampawn atanga raltlan engemaw zat an awm mek thu leh raltlan zinga nau piang te chu Register tih phal ala nih loh thu te sawiin, fimkhur taka an hna thawk turin he huna tel te chu a chah a. “Kan hna tlin tak leh felfai taka kan tih hi kan District tana kan theihna kan pekna a ni,” a ti bawk.

Serchhip District-ah hian Registrar of Births & Deaths hi Unit 50 awm mekin heng zinga 42 te chu khua leh Veng hrang hranga tualchhung mi ruatchhuah te an ni a, midang 8 te chu damdawi In-a thawkte an ni thung a, tunah hian Serchhip bikah Unit thar pathum hawn belh tum mek a ni.