Aizawl District-ah thubuai 1460 ziahluh a ni

Zonuna Kawlni (LENKAWL) • January 18, 2025 • Comments • Mizoram

Kum kalta 2024 chhung khan Aizawl District-ah Police ten thubuai 1460 zet an ziaklut.

Nimin khan Aizawl District Superintendent of Police Rex Zarzoliana Vanchhawng hovin Crime Review Meeting neih a ni a, he hunah hian kum kalta chhunga Police te hnathawh hrang hrang thlirho niin kum 2024 chhung khan Aizawl DEF hnuaia Police Station hrang hrangah thubuai (case) 1460 ziahluh a ni a. Aizawl Police Station-ah thubuai ziahluh tam ber niin thubuai 489 ziahluh a ni. Nikum-a thubuai ziahluh zawng zawng atang hian Case 712 (48.77%) chu chhuichhuah niin Chargesheet tawh a ni a, thubuai chhui lai 404 a la awm bawk. Kumin 2025-ah January ni 15 thleng khan thubuai 104 ziahluh tawh niin chung zinga thubuai 57 te chu chhuichhuah (detect) tawh a ni bawk a ni.

He thutkhawm ah hian Aizawl SP Rex Zarzoliana Vanchhawng chuan kalkhawmte chu mahni hna leh mawhphurhna tha taka hlen zel turin taima tak leh inpekna tak tak nen a thawk turin a chah a. Dan leh thupek kenkawh kawngah dan ang zel a kal a pawimawh thu sawiin, mipuite himna ngai pawimawh turin a chah bawk a. Hnuchhui (investigation) kawngah tun aia inchher hriam a pawimawh thu a sawi bawk a ni.