Nikum-ah Serchhip END in Zu leh ruihhlo man tam
Serchhip-a Excise & Narcotics Department hotute hnen atanga LENKAWL in thu a dawn danin nikum (2024) chhung khan Serchhip-a Excise & Narcotics Department hian Rakzu litre 2053.8 zet manin Zu bilhlai Tin 334 an man a, Sapzu (IMFL) um puitling 83 manin Beer can 672 an man bawk a, Zu siamna Bel 31 manin heng Zu leh a kaihhnawih ah hian MLP Act 2019 hnuaiah thubuai 286 ziahluh a ni a, mi 318 lai man an awm bawk a ni.
Nikum chhung vek khan Serchhip-a Excise & Narcotics Department hian Heroin gram 1435.56 manin Ganja kg. 5 chuang an man bawk a, ND&PS Act hnuaiah thubuai 34 ziahluh niin mi 42 man an ni bawk. Heng Zu leh ruihtheih thil an man kaihhnawih ah hian lirthei, LMV 5 manin Three Wheeler (Auto Rickshaw) pahnih man an nei bawk a ni. Nikum chhung vek khan Serchhip-a Excise & Narcotics Department hian Foreign & Liquor & Spirit hnuaiah chhiah Rs. 19,03,230/- hmuin Fines & Confiscation hnuaiah Rs. 2,71, 200/- an hmu bawk a ni.