Model Code of Conduct hman a nih avangin inkaihhruaina te zawm turin mitin te ngen an ni
Serchhip District-a Village Council Inthlanpui neih tur atana inbuatsaihna kal mekah hian nimin khan District Election Officer leh Bawrhsap Paul L. Khuma hovin Serchhip DC Meeting Hall-ah Inthlanpui atana inbuatsaihna sawiho a nih bakah MCC chungchang inhrilhfiahna hun hman a ni a, he hunah hian Bawrhsap chuan Serchhip District mipuite tawiawmna avangin tluang leh felfai takin inthlanna neih a lo nih tawh thin thu leh tun tum Village Council inthlanpui lo awm tur pawh harsatna awm loa hmachhawn theih an inbeisei thu a sawi a. He inthlanpui neih tur atan hian VC area tinah Returning Officer ruat fel tawh niin Training vawikhatna buatsaih a ni tawh tih a sawi a. Presiding Officer leh Polling Officer te pawh khaw chhunga sawrkar hnathawkte ruat an ni dawn tih sawiin, heng mite tan hian training vawi thum buatsaih tum a nih thu a sawi bawk a ni.
Kumin inthlanah hian a vawikhatna atan Common Election Camp siam a ni dawn tih Bawrhsap chuan sawiin, hei hi Party Worker te inkara boruak tha lo pumpelhna atana duan niin Polling Station bulah party tin te leh Candidate te awmkhawmna tura siam a nih tur thu leh party Symbol, Flag, thuziak leh Party leh Candidate lam kaihhnawih te tar leh kenluh phal a ni dawn lo tih a sawi a. Inthlanna felfai leh thianghlim taka zawhfel a nih theihna tur leh vote nei zawng zawngin vote an thlak theuh theihna turin Political party te leh mipuite thawhhopuiah a sawm a. Model Code of Conduct hman mek a nih avangin inkaihhruaina zawm theuh turin party mi te leh mipuite a ngen bawk a ni.
He hunah hian Addl. SP Saidingliana Sailo chuan Inthlanpui atana venhimna an ruahman dan te tarlangin, Serchhip District chu Zone 4-ah leh Sector 7-ah thenin a tul hun apianga che chhuak thei turin Quick Response Team (QRT) 5 an din bawk tih a sawi a. Harsatna leh buaina awm lova felfai leh thianghlim taka inthlan hmachhawn thei turin an inbuatsaih thu a sawi a ni.
Election Officer F. Lalnisai chuan he huna kalkhawmte hi Model Code of Conduct chung-chang hrilhfiahin, MCC bawhchhiatna a complain thehlut duh te tana thehluh theih dan te leh hemi kaihhnawiha hriat tur pawimawh hrang hrangte a tarlang bawk a ni.