Serchhip District-ah VC Seat 9 nei phak awm lo
The Lushai Hills District (Village Councils) Amendment Act, 2014 in a tarlan angin VC Seat neih zat hi siam a ni a, VC seat neih zat hi VC Area-a In awm zat atanga teh niin In 200 hnuailam-ah Member 3 awmin Seat pakhat chu hmeichhia te tana hauh a ni anga, In 200 atanga 500-ah Seat 5 awmin hmeichhia te tan Seat pakhat bawk hauh a ni ang. In 500 atanga 1000-ah Seat 7 awmin hmeichhia te tan seat pahnih hauh a ni anga, In 1000 aia tam awmna ah Seat 9 awmin hmeichhia te tan Seat pathum hauh a ni bawk ang.
Serchhip District-ah hian Village Council 56-ah inthlanna hi neih tur niin heng zinga VC pahnih te chu VC ding thar tur a ni a, heng VC te hi VC pakhat-a awm thin North Vanlaiphai VC chu VC pahnih ah then niin North Vanlaiphai-I leh North Vanlaiphai-II tih a ni dawn a. Thenzawl East Village Council pawh thenin Thenzawl South VC siam thar a ni dawn bawk a, Thenzawl-ah hian VC 5 a awm dawn ta bawk a ni. Serchhip District-a VC 56-ah hian Seat 254 a awm a, heng zinga 188 te chu General Seat niin a dang 66 te chu hmeichhia te tana Seat hauh a ni dawn thung a, heng VC hrang hrangah hian In 14,762 awmin Vote nei thei mipa 24,400 leh hmeichhia 26,043, an vaiin Vote nei thei 50,443 an awm a ni.
Serchhip District-a Village Council 56 te zingah hian Seat awm thei tlem ber, Seat 3 nei thei VC 23 awmin Seat 5 nei thei VC 23 bawk awmin Seat 7 nei thei VC 10 an awm a, Seat 9 nei thei VC an awm lo a ni. Serchhip District chhunga VC hrang hrang zingah Seat 7 nei thei te hi East Lungdar, Khawlailung, North Vanlaiphai-I, North Vanlaiphai-II, New Serchhip North, New Serchhip South, Serchhip P&E Veng, Thenzawl East, Thenzawl South leh Thenzawl West te an ni.