NHIDCL leh Project Pushpak ten Mizoram-a an hnathawh te Governor hnenah an sawifiah

Nimin khan National Highways Infrastructure Development Corporation Limited (NHIDCL) leh Project Pushpak hotute chuan Governor Gen (Dr) VK Singh chu Raj Bhavan-ah hmuin an hnathawh hrang hrangte an sawipui.

NHIDCL Regional Office, Aizawl-a Executive Director Virendra Kumar Jakhar leh a thawhpuite chuan nimin tlai khan Mizoram Governor Gen. (Dr) VK Singh chu Raj Bhavan-ah hmuin Mizoram chhunga NHIDCL hmalakna leh hmachhawpte an sawipui a, he hunah hian NHIDCL Regional Office Executive Director chuan Mizoram-a an hmalakna te Powerpoint Presentation hmangin a sawifiah a, he huna a tarlan danin Mizoram-ah National Highway hna khawih KM 1523-a thui a awm a, NHIDCL kutah KM 921 awmin KM 602 chu PWD kutah a awm a. NHIDCL enkawl zinga KM 547 chu zawhfel ni tawhin KM 221-a thui thawh mek a ni a, hmalak lehna tur KM 153-a thui an nei bawk a ni.

Governor chuan NHIDCL kaltlanga Mizoram-a kawngpui siamte chu Mizoram chak lakna pawimawh tak tak, nitin khawsak phung thlenga nghawng thei a nih thu a sawi a. NHIDCL te chu kawngpui tha leh tlo huntiam chhunga zofel hman tura tan la tur leh tunlai thiamnate hmang tangkai turin a chah a. A bik takin State pawn atanga mamawh lakluhna kawng pawimawh tak Silchar pawhtu kawngpui chu ngai pawimawh lehzual turin a chah a ni.

Nimin vek khan Project Pushpak-a Chief Engineer Girish Prasad Singh chuan Governor hi Raj Bhavan-ah hmu bawkin Mizoram chhunga Border Road Organisation (BRO) hnuaia hmalakna leh hmachhawpte a hrilhfiah a, Pushpak Chief Engineer chuan he hunah hian BRO hmalakna te Powerpoint Presentation hmanga sawifiahin, tun thlengin Project Pushpak Mizoram in kawng KM 3150-a thui an siam zawh tawh thu leh KM 2392 chu State leh Central Agency-te kut-a an hlan tawh thu a sawi a. Mizoram hmun hrang hranga kawngpui 14 an enkawl mek zinga kawngpui 5 te zawhfel hnua an enkawl zui mek thu leh kawngpui dang 4 te chu Leidawh mek tih loh zawhfel a nih bakah kawngpui siam mek 5 a awm thu a sawi a. Kumin chhungin Lei 4 dawh zawhfel hman an tum thu a sawi bawk a ni.

Governor Gen. (Dr) Vijay Kumar Singh, PVSM, AVSM, YSM (Retd) chuan Mizoram ang tlangram chhengchhe takah technology thar ber berte chhawr tangkai chunga hun leh senso tlem zawka inkalpawhna tha zawk siam tum turin Project Pushpak te chu a chah a. An Project te a hun taka zawhfel a nih theih nana harsatna awmte a rang lama chinfel dan ngaihtuah zel turin a chah bawk a ni.