Mizoram District 9-a VC leh LC Inthlanpui chu February 12, 2025-ah neih a ni dawn

Mizoram District 9-a Village Council leh Local Council te term chu thla thar February 19-ah a tawp dawn tak avangin thla thar February 12-ah VC leh LC Inthlanpui neih a ni dawn a, heng inthlan chuh tumte tan hian nimin atang khan hming pekluh hun pawh hawn nghal a ni.

State Election Commission, Mizoram-a Commissioner Dr. Lalthlangliana chuan nimin khan Aizawl-ah thuthar thehdarhtute kawmin heng Inthlanna neih hun tur hi a puang a, Constitution of India- Article 243K in thuneihna a pek dungzuia sub-rule (1) of Rule 3 of The Mizoram (Election to Village Councils) Rules, 2014 in mawhphurhna a pek angin State Election Commission, Mizoram chuan Aizawl, Lunglei, Serchhip, Champhai, Mamit, Kolasib, Siatual, Khawzawl leh Hnahthial District chhunga Village Council - 544 te tan Inthlanpui vawi 21-na tur chu February 12, 2025 (Nilaini) hian a buatsaih dawn tih a puang a ni.

Ruahman ang chuan Village Council Inthlanpui hi District 9-ah neih tur niin VC 544-ah Inthlanna hi neih a ni dawn a, heng VC hrang hrang ah hian Seat 2416 awmin heng zinga 1803 te chu General Seat niin a duh apiang tana chuh theih a ni dawn a, Seat 613 te erawh chu hmeichhia te tana Seat hauh a ni dawn a, Vote nei thei mipa 2,16,392 leh hmeichhia 2,23,017, an vaiin 4,39,409 an awm bawk a ni.

Aizawl leh Lunglei-a Municipal huamchhungah pawh Local Council Inthlanna chu neih nghal a ni dawn a, AMC huamchhunga Local Council 87-ah inthlanna neih tur niin a vaiin Seat 575 a awm dawn a, heng zinga 418 te chu General Seat niin a dang Seat 157 chu hmeichhia te tana hauh a ni dawn a, Vote nei thei 2,44,726 an awm a ni. LMC huamchhunga Local Council 24-ah pawh inthlanna hmasa ber neih a ni dawn a, Seat 148 awmin heng zinga 110 te chu General Seat niin a dang Seat 38 chu hmeichhia te tana Seat hauh a ni a, Vote nei thei 41206 an awm a ni.

State Election Commission, Mizoram in ruahmanna a siam dan chuan Inthlanna neih hun tur puan a nih rual hian Inthlan chuh tumte tan hming pekluhna hun hawn nghal a ni a, January 23, 2025 thlengin zing dar 11:00 atanga tlai dar 3:00 thlengin Nomination hi thehluh theih a ni anga, a tuk January 24-ah hming pekluh te hi enfiahin January 27, 2025 tlai dar 3:00 thlengin inhnukdawk duhte tan hun hawn a ni anga, inhnuk-dawk lo te hnenah an chhinchhiahna (Symbol) pek nghal tur a ni anga, January 29, 2025 hmain Candidate list hi Commission-ah thehluh hman tur a ni ang.

Inthlanna atana Vote thlak hi February 12, 2025-ah neih tur niin zing dar 7:00 atanga tlai dar 4:00 thlengin Vote nei te tan Vote thlak theih a ni anga, Vote thlak zawh hnu zan dar 7:00-ah Vote tla te hi chhiar tur niin Vote thlak hun-a thlak zo hman lo leh zan dar 7:00-a Vote thlak zo hman lo te chuan Vote thlak an zawhfel veleh Vote tla te an chhiar nghal anga, engemaw avanga Vote thlak that ngai a awm chuan February 13-ah Vote thlak that tur niin February 14, 2025-ah chuan VC hrang hrang ah hian Executive Body siam fel hman tur a ni a. February 15-ah chuan Inthlanna hi zawhfel vek hman tura ruahman a ni.

State Election Commission, Mizoram in a tarlan angin VC leh LC te term kum 5 ni mek chu hman chhunzawm a ni dawn a, Inthlan neih hun tur puan a nih rual hian Model Code of Conduct chu hman tan nghal a ni bawk.

State Election Commission chuan inthlanna fel fai leh muanawm kan neih theih nan inthlanna buaipuitu, Political Party te, Media te, NGO te leh mipui tawiawmna a ngen a. Mipui duhthlanna kaltlanga tualchhung inrelbawlna tha tak kan neih zui zel theih nana theihtawp chhuah theuh turin mitin te a sawm a ni.