CM in hmunphiah a vailiam

King Industries ten Mizoram Hmunphiah thar te Mizoram pawn-a an thawnchhuah tur chu nimin khan Chief Minister Lalduhoma chuan a vailiam.

Aizawl Falkland-a King Industries hmuna hemi puala hun hman ah Chief Minister chuan Hmunphiah bikah Agerement siampui mi 7 an nei tih sawiin, “Heng agreement kan siam puite hian sawrkar facility te an hman kan phalsak dawn a ni,” a ti a, “Anni bakah hian midang lei duh an awm pawhin sawrkar chuan a phal vek a, inelna thianghlim tak awm se kan duh a ni,” tiin “ZPM ten kan au hla ber leh kuthnathawktute tan thlai 4, mumal tak leh man hla zawka an hralh theih nan kan thlangchhuak a, mipuiin chumi tithlawhtling tur chuan min thlang tling a, chak takin hma kan la mek a ni,” a ti bawk.

He hunah hian King Industries CEO Laldinliana chuan kum 2021 atang khan Mizo-ram Hmunphiah hi an supply tan tih sawiin, hemi kum hian hmunphiah hi kg ah Rs. 115-in Grade A an lei a, Kum 2022-ah kg-ah Rs, 140-a leiin Gala Brush chuan Meghalaya broom hi kg ah Rs. 80 in an lei tho tih a sawi a, mahse Mizoram Hmunphiah that zia an hriat avangin a man pawh an pe sang ngam tih a sawi a. Gala Brush hian Mumbai leh Gujarat-a hmunphiah an siam chu India ram hmun hrang hrangah thawnin, India ram pawnah te pawh an thawnchhuah thu a sawi a. Nikum khan hmunphiah kg nuai 3 vel an lak thu leh Sorting, Grading, Packing leh Loading te hnam-dang kuta awm thin chu Mizo thalai te training pe in, an lo khawih ve thei ta tih a sawi bawk.

King Industries hian tun dinhmunah hmun-phiah hi vawi 5 an thawn tawh a. Howrah West Bengal leh Patna Bihar-ah vawi hnih ve ve leh Guwahati-ah vawi khat an thawn tawh a, Mizo-ram atanga an thawn te hi an Warehouse-ah dahin hei hi anmahni lamin dawr hrang hrangah an lo pe chhawng ve leh thin a ni.