MYC leh HCL Tech. te thawhhona ah thukhawm

Mizoram Youth Commission (MYC) leh HCL Technologies Limited te’n thawhhona thuthlung an lo ziah tawh bawhzuina kal zelah nimin khan Aizawl-a MYC Office-ah LESDE Department, School Education Department leh Higher & Technical Education Department te chu an thukhawm a. HCL Tech hi Technology Company niin, ram hrang hrangah an inzarpharh a. Class-XII zo tawh te tan training an pe thin a. IT Role atan thla 6 atanga thla 12 chhung training leh Associate Role atan thla 3 atanga thla 12 chhung training an pe thin a, training chhung hian stipend an pe thin bawk a ni. Training zo te tan hian HCL-ah hna a pe nghal thin a, Graduation course online-in a zirtir thin bawk a ni.

Nimin-a thutkhawm ah hian he hmalakna hi Mizo thalai te tan programme tha tak a lo nih ngei an beisei thu member te chuan an sawi a. Chumi atan chuan MYC leh a kaihhnawih Department pawhin theihtawp hmalak an tum thu an sawi bawk.