Minister hovin DDU-GKY hnuaia hmalakna thlirho a ni

Rural Development Minister Prof. Lalnilawma hovin nimin khan Mizoram State Rural Livelihoods Mission (MzSRLM) hnuaia DDU-GKY chungchangah Project Implementing Agency (PIA) hrang hrangte nen an hmalakna thlirletna hun hmangin hmalak leh zel dan tur (way forward plan) ngaihtuah nghal a ni.

DDU-GKY hi Ministry of Rural Development Department hnuaia Skills Development project niin, thingtlanga cheng thalai kum 18-35 inkar ten eizawnna ngelnghet an neih theihna tura themthiamna (skills) training pekna a ni a. Heng Skills Development atan hian training pe turin PIA te hmangin trade hrang hrangah training pek thin a ni a. Nimin a he hun hman ah hian RD Minister Prof. Lalnilawma chuan tun dinhmunah DDU-GKY hnuaiah hlawhtlinna tam tak hmuh tawh a ni nain, a Department ang leh Project Implementing Agency (PIA) lamah pawh hmasawn zel tura hmalak erawh a pawimawh thu a sawi a. DDU-GKY 2.0 program thar chu tlangzarh theih tep a nih thu a sawi bawk.

He hunah hian MzSRLM-a CEO Zosangzuali Pachuau chuan DDU-GKY hnuaiah nasa taka hmalak a ni chu lawmawm a tih thu a sawi a, State Mission Manager Lalvensanga’n presentation pein, tun dinhmun ah DDU-GKY hnuaiah thingtlanga cheng thalai mi 2892 training pek tawh niin mi 1788-in India ram hmun hrang hrangah leh India ram pawnah te hna an hmu tawhin an thawk mek a ni. DDUGKY hnuaia training theihte chu Airline Cabin Crew, Food & Beverage Service Assistant, Domestic Data entry Operator (DEO), Retail Sales Associates, House Keeping Trainee leh a dang te a ni.