Union Minister of State for Tribal Affairs-in Mamit District-a sawrkar hotute a kawm

Mizoram lo kal Union Minister of State for Tribal Affairs Durga Das Uikey chuan nimin khan Mamit tlawhin Mamit-a sawrkar Department hrang hrang hotute a kawm.

Mamit DC Conference Hall-a Official te nen an inkawmna ah hian Union Minister chuan Aspirational District, Mamit District chhunga hmalakna hrang hrangte a taka hnathawh a nih leh nih loh enfiaha tlawh a nih thu a sawi a, Prime Minister-in tlangrama chengte hmasawnna chu a ngaihpawimawh a nih angin hmasawnna tura Scheme hrang hrang duante chu a hlawhtlinna turin a kaltlangna Department Officials-te chuan ngaihtuahna tak tak an sen a tul a, Schemes hlawhtlinna chu an kuta inngat a ni tih hre thar turin a chah, a bikin Education leh Health Sector hnuaia hmalakna te chu hmasawnna hna kala pawimawh tak a nih avangin a chhawrtu mipuite chawikang ngei tura theihtawpchhuah a tul takzet thu a sawi a. Aspirational hnuaia line Department hrang hrangte hmalakna, hmachhawp leh harsatna awmte a ngaihthlak sak bawk a ni.

He thutkhawm hi Mamit DC K. Laltlawmlova chuan kaihruaiin an District dinhmun te a tarlang a, Aspirational District hnuaia hmalakna tehfung hrang hranga tehna-ah Mamit District-in dinhmun tha tak tak a lo hauh tawh a, hemi avang hian NITI Aayog atangin vbc. 19 lai dawn a ni tih a sawi a, Ranking hnuhnung berah hian Overall Performance 5th position an hauh mek thu a tarlang bawk.

Union MoS for Tribal Affairs hian nizan hmasa khan Aizawl-a Regency Hotel Conference Room-ah Social Welfare and Tribal Affairs, Women & Child Development Department changtu Minister Lalrinpuii leh Department official-te a kawm bawk a, Union Minister chuan India ram chhunga Tribal te tihhmasawn a ngaihpawimawh thu sawiin, Sawrkar laipui chuan India ram pumah leh a bik takin India hmarchhak State a tribal hnam hrang hrang chengte hmasawn nan tan a lak ngawrh thu a sawi a. Ramchhunga cheng zawng zawngte tan hmasawnna rualkhai leh huam kim tak siam a pawimawh thu sawiin, Tribal zingah pawh hnam hnufual zawk te chawikang tura Ministry of Tribal Affairs kaltlanga ruahmanna siam hrang hrangte a tarlang a. Mizoram tan pawh tun kum nga (5) chhunga Ekalavya Model School atan te, Tribal Research Institute leh hmalakna dang hrang hrang atana sawrkar laipui atana sum pekchhuah dan sawiin, Mizoram in chak taka hma la zel tura a duhsak thu a sawi a. Rang zawka sum pekchhuah belh zel nih dawn chuan chak zawka hman zawh a tul avanga hnathawh chak a tul thu a sawi bawk.