Hmunphiah lei dan tura ruahmanna tih danglam duh

Tlabung leh a chhehvel khaw 30 vela Hmunphiah chingtu, Tlabung Broom Planter Association chuan sawrkar-in Hmunphiah lei dan tur ruahmanna a lo siam fel tawh thenkhat chu tha an tih loh thu an sawi.

Tlabung leh a chhehvela Hmunphiah chingtute hi Inrinni khan Tlabung-ah inhmukhawmin kumin hian hmunphiah metric tonne 80 chuang tharchhuah leh theih beisei a ni tih sawiin, hei hi Society pakhat tan chauha lei zawh vek theih ni dawna a lan loh avangin Hmunphiah lei tur bik thlang lovin a duh apiangte chu Sawrkar in kawng hawn sak zawk se an duh tih an sawi a, hei bakah hian Sawrkar-in Hmunphiah lei leh hralhna hmun tur, Primary Collection Centre leh Secondary Collection Centre a siam pan ngai zel tur chu hmun kilkhawr zawka awm Hmunphiah chingtute tan phurrit a tling dawn niin an sawi. 

Hmunphiah chingtu kalkhawmte chuan kumin hian Hmunphiah an tharchhuah chu a ro hnuah kg khat Rs. 100 aia to-a hralh theih an in beisei tih sawiin, Sawrkar-in a leina tur zat bithliah kher lo se an duh tih an sawi a, kuthnathawktute hmakhua ngaia ruahmanna a lo siam tawhte ti danglam turin Sawrkar an ngen tih an sawi a ni.