A bika phalna lak ngai ah Mizoram inpeih

Sawrkar laipuiin ramdang mite Mizoram-a an luh dawna a bik taka phalna lak ngai leh tura a rawn tih hnuah hmang thei turin Mizoram sawrkar a inpeih.

Mizoram Sawrkar Home Secretary Vanlalmawia’n Akashvani Aizawl a hrilh danin sawrkar laipuiin Myanmar ramri a awm Mizoram, Manipur leh Nagaland State-a lut tur ramdang miten e-Foreigners Regional Registration Office (e-frro) portal-ah a bika luh phalna, Restricted Area Permit (RAP) leh Protected Area Permit (PAP) te chu online a dil tur a ni an tih avangin nikum December ni 17 atangin hman tan a ni a, FRRO chu Kolkata-ah daih a awm avangin dilna chu a hranpa in Mizoram sawrkar ah a lut lo a, Kolkata atanga District-ah an rawn thawn hunah chauh an lo hmu thei tih sawiin, tun dinhmunah FRRO Kolkata atanga phalna an pek dawn mumal an la neilo tih a sawi.

Nikum December thla khan Ministry of Home Affairs chuan venhim ngai bik State a ramdang mite luh chungchangah Mizoram leh State dang pahnihte biakhmuhtheih hmangin sawihona a buatsaih a, hetah hian Ministry of Home Affairs hotute chuan State pathuma an kalpui dan tur tlangpui an hrilh a ni.

Kum 2010 atanga hlih rih, he khuahkhirhna tuai thar leh a nih chhan hi ramdangmite’n heng State-ah te hian buaina an chawhchhuah hlauhthawn vang nia sawi a ni a, RAP leh PAP neih hmasa tura tihna hi Foreigners (Protected Areas) Order, 1958 hmanga kenkawh thin a ni a, tuna khuahkhirhna thlah zalen hi December, 2027 thleng a ni chungin sawrkar laipui chuan a rawn tharthawh leh a ni.