END in nikum chhungin Zu leh ruihhlo man tam

Excise & Narcotics Department (END) chuan kum 2024 chhung khan Zu litre 59,694.420 leh Sapzu (IMFL) um 31,284 an man a, Heroin kg 46.680 an man bawk.

Mizoram-a END hian kum kalta 2024 chhung khan Mizoram hmun hrang hrangah Rakzu litre 59,694.420 manin, Myanmar Zu (BEDC) litre 3,662.400 leh Sapzu um 29,856 an man a, Sapzu te hi ml. 750 um 13,578, ml. 375 um 6,101 leh 180 ml. um 11,605 te a ni. Hemi hun chhung hian Zu bilh lai tin 1,08,411, dawidim kg. 188 leh zu siamna atana hman Bel 608 an man a, Beer um 298 leh bur 21,902 bakah, foreign wine um 15, Fruit Wine litre 55,181.300 an man a. Zu leh beer kaihhnawihah hian lirthei chi hrang hrang 142 an man bawk. Hemi hun chhung hian Heroin kg. 46.680 an man a, Methamphetamine kg. 140.839, Ganja kg. 578.592, khuh damdawi (cough syrup) kg. 615.130 leh ruih theih thil dang engemaw zat an man bawk a ni.

Heng Zu leh ruihhlo kaihhnawih ah hian thubuai engemaw zat ziaklutin mihring man pawh an nei nual a, NDP&S Act hnuaia thubuai 543 ziaklutin mi 739 an man a, MLP Act, 2019 hnuaiah thubuai 6,211 ziaklutin mi 5,587 an man a, ME Act, 1973 hnuaiah thubuai 525 ziahluh niin mi 526 man an nei bawk a, Drugs and Liqour Law hnuaiah mi 48 man an ni bawk. Heng zu leh a kaihhnawih a an man zingah hian ram dang mi (foreigner) 48 an man bawk a ni. END hian nikum 2024 chhung khan ruihhlo phurhna a hman lirthei 142 an man bawk a, lirthei an man zingah hian LMV tam berin 83 an man a, Two Wheeler in dawtin 50 man a ni a. Three Wheeler 3, MMV 2 leh HMV 1 man a ni bawk. 

Nikum 2024 chhung khan END hian Chhiah chi hrang hrang Rs 2,37,03,744.00 an hmu a, chungte chu, Foreign Liquor & Spirit atangin Rs. 1,86,89,504, Fines & Confiscation atangin Rs. 49,69,240 leh hmuhna dang (other receipt) atangin Rs. 45,000 te a ni.