Governor atan Gen. (Dr) Vijay Kumar Singh lalut
Governor thar lakluhna Inkhawm hi Raj Bhavan Circular Lawn-ah neiin Gauhati High Court Chief Justice Vijay Bishnoi chuan General (Dr) Vijay Kumar Singh hi rinawmna thu tiam tirin Mizoram Governor atan a lalut a. Chief Secretary Khilli Ram Meena chuan President of India-in Governor atana a ruatna a chhiarchhuak a ni. Nimin-a Governor thar lakluhna hunah hian Chief Minister Lalduhoma, Chief Minister hlui pahnih Lal Thanhawla leh Zoramthanga, Speaker Lalbiakzama, Home Minister K. Sapdanga, Leader of Opposition Lalchhandama Ralte, Cabinet Minister-te, Gauhati High Court Judge, Dy. Speaker, Minister of State-te, Lok Sabha MP, Rajya Sabha MP, MLA te, Chief Secretary, DGP, Political party leh NGO hruaitute bakah sawm bik mi pawimawhte an tel a ni.
General (Dr) Vijay Kumar Singh (Retd) hi May ni 10, 1951 khan Captain Jagat Singh (a hnua Colonel ni ta) leh Krishna Kumari te inkarah Pune-ah a lo piang a. Bharti Singh nen inneiin fanu 2 leh tu 1 an nei mek a ni. Birla Public School, Pilani leh National Defence Academy-ah te lehkha zirin Sipai a luh hnuah Indian Army Chief of the Army Staff 26-na dinhmun a chelh tawh a ni. Sipai-a a tan chhung hian chanvo pawimawh tak tak a chelh a. Chawimawina hrang hrang dawngin Sri Lanka-a IPFK kaihhnawih operation avangin Yudh Seva Medal (YSM) hlan a ni a, kum 2005-a Counter Insurency force hlawhtling taka a kaihhruai avangin Ati Vishisht Seva Medal (AVSM) hlan niin, kum 2009-a Eastern Theatre-a hna tha leh chhinchhiah tlak bik a thawh avangin Para Vishisht Seva Medal (PVSM) hlan a ni a. March ni 31, 2010 khan Chief of the Army Staff dinhmun luah tanin, May ni 31, 2012 khan a chawl ta a. March ni 11, 2011 khan United States War College (Class of 2001) International Fellows Hall of Fame 33-na atan lakluh a ni a, Indian Armed Forces Officer zinga lakluh hmasak ber a ni.
General Singh hian March ni 1, 2014 khan Bhartiya Janta Party zawmin hemi kum-a Lok Sabha Inthlanpui-ah Ghaziabad Constituency atangin India rama inhnehna sang berin a chak a. MoS for External Affairs, MoS Independent charge for DoNER leh MoS for Overseas Indian Affairs mawhphurhna te a chelh a. MoS MEA a nih laiin ram dang nena inbiakna pawimawh hrang hrangahte a tel thin bakah kum 2019 Parliamentary Election chuh lehin thlantlin a ni leh a, MoS Road Transport and Highways dinhmun chelhin June 2021 khan MoS Civil Aviation mawhphurhna pek belh a ni bawk.
Comments
Post a Comment