Human Papilloma Virus Vaccine hmang thei hnai

Chhul hmawr Cancer laka invenna Human Papilloma Virus Vaccine, HPV Vaccine tia sawi chu Mizoram-ah hun reilote ah hman tan theih tura beisei a ni.

    Directorate of Health Services hnuaia Jt. Director, Extended Programme on Immunization EPI leh State Immunization Officer Dr. Lalmuanawma Jongte chuan Akashvani Correspondent nen an inkawmna ah he thu hi sawiin, HPV Vaccine chu hmeichhe Chhul hmawr Cancer danna tura tih a ni tih sawiin, hmeichhe naupang leh tleirawl kum 9 atanga kum 14 inkar tan sawrkar chuan a thlawnin Vaccine a pe dawn tih a sawi a. Mizorama School hrang hrang leh School kal lo ah naupang hming khawnkhawm niin mi 75,000 vel hming lakkhawm tawh a nih thu sawiin, Mininstry lamah an hming thehluh a nih thu leh hei hi Single dose a pek tur a ni dawn a, mamawh dan a zirin raltlante huam an nih tur thu a sawi bawk. State Immunization Officer chuan HPV hri danna pe thei tur chuan India ram State thlanchhuah zingah Mizoram chu a tel thu sawiin, HPV Cancer chu mipa aiin hmeichhia-ah a tam zawk avangin Mizoram sawrkar chuan hmeichhe naupangte a pe rih phawt dawn tih a sawi bawk.