SVAMITVA Scheme kaltlangin Mizoram-a khua 18-ah Property Card 1754 semchhuah a ni

Prime Minister Narendra Modi chuan Inrinni khan SVAMITVA Scheme kaltlangin India rama State 10 leh Union Territory 2-a In hmun neitu nuai 65 chuangte hnenah Property Card a semchhuak a. Mizorama khua 18 atangin Property Card hi 1754 in an dawng a ni.

Survey of Villages and Mapping with Improvised Technology in Village Areas (SVAMITVA) Scheme kaltlanga Property Card semna hun hi Mizoram-ah chuan Governor Gen (Dr) VK Singh hovin Raj Bhavan atanga lo zawmin Revenue Minister B. Lalchhanzova leh Department mi pawimawh te pawhin an telpui a. He hunah hian Governor chuan Mizoram chu North Eastern Region zinga Property Card sem chhuak hmasa ber a ni chu chhuanawm a tih thu sawiin, Land Revenue & Settlement hotute chu SVAMITVA Scheme hnuaia hmalakna te a hlawhtlin theih nana tan la chhunzawm zel turin a chah a. Mizoram atanga hamthatna dawngte a lawmpui thu sawiin duhsakna a hlan a ni.

SVAMITVA Scheme hi April ni 24, 2020 khan Prime Minister-in a hawng a, he Scheme hi In hmun neitute tana Revenue document felfai tak, Drone Survey leh GIS Technology hmanga chhinchhiah thlapna a ni a. Bank loan lak nana dahkham bakah pawimawh dangah te pawh a hman theih a ni. Hemi kalpui tur hian Mizoram Sawrkar leh Survey of India te chuan thawhhona thuthlung chu July ni 8, 2021 khan an ziak a. Revenue survey la tih lohna khuaah te December ni 9, 2021 atang khan Drone Survey tan niin, December ni 2, 2024 khan zawhfel a ni a, District 9-a khua 319 ah te Drone Survey hi neih a ni.

Mizoram hi North Eastern Region zinga Property Card sem chhuak hmasa ber niin, April ni 24, 2023 khan Property Card semchhuah tan a ni a, Inrinni-a sem chhuah nen hian tun dinhmunah Mizoram-ah Property Card 2,909 sem chhuah a ni tawh a. Ruahman dan chuan he hmalakna kaltlang hian Mizoram-ah Property Card 35,000 bawr vek pek chhuah tum a ni.