Mizoram-ah raltlan 42,164 awm mekin District hrang hrangah buhfai sem tan mek a ni

Sawrkar laipui-in Mizorama awm mek raltlante tana a thlawna sem tur buhfai a rawn pek chu Aizawl District tih lohah chuan sem mek zel a ni a. Tun dinhmunah Mizoram hmun hrang hrangah raltlan mi 42,164 an awm mek nia chhinchhiah a ni bawk.

Food, Civil Supplies & Consumer Affairs Department hotute sawi danin Myanmar, Manipur leh Bangladesh atanga Mizoram-a raltlan awm mek mi 40,000 vel tana buhfai sem tur ruahman MT 1,379 leh quintal 30 hi November ni 18 khan FCS&CA hian Food Corporation of India (FCI) hnen atanga lachhuakin District tin Kudam-ah a thlen fel vek hman a. District thenkhat thuneitute chuan November ni 20 atang khan an District chhunga raltlante hnenah an sem tan hman a. Raltlan tamna ber Champhai District-ah Myanmar mi 13,986 leh Manipur mi 404 awmin, an tana buhfai ruahman chu quintal 4,533 a ni a, Ningani kalta atang khan an sem tan a ni. Raltlan ngah ber dawttu Lawngtlai District in Myanmar raltlan 5,922, Bangladesh raltlan 2,014 leh Manipur mi 84 an mikhual mek a. Lawngtlai District tana buhfai sem tur ruahman hi quintal 2,526 a ni a, sem chhuah tan a ni tawh a ni. A dawt leha raltlan ngah ber chu Aizawl District niin a vaiin raltlan 7,803 an awm mek a, heng te hi Myanmar mi 3,411 leh Manipur mi 4,392 niin buhfai quintal 2,458 sem tura ruahman a ni.

Aizawl District a buhfai sem chhuah a la nih loh chhan hi a thlawna buhfai dawn mamawh lo raltlan hausa tak takte an awm avanga zirchian mek a nih vang a nih thu District thuneitute chuan an sawi a. He thil hi chinfel a nih hnuah chauh sem chhuah a ni dawn tih an sawi a. Siaha District-ah Myanmar raltlan mi 5,953 awmin Manipur leh Bangladesh mi an awm lova, Siaha district hian November ni 20 atang khan buhfai pekchhuah tawh niin buhfai semchhuah tur an dawn hi quintal 1,875 a ni.

Raltlan hi Mizoram chhuahsan leh lo luh belh an awm reng avangin a awm zat dik tak hi a danglam reng a. Tun dinhmun thar bera raltlan awm zat chu 42,164 a ni a. Myanmar raltlan 33,032, Manipur raltlan 7,118 leh Bangladesh raltlan mi 2,014 te an ni.