Sawrkar-ah ruang phurhna Bill 111 zet a lut tawh

Mizoram sawrkarin khaw danga ruang phurh man a tum sak theih hnuah ruang phurh man dilna 111 a lut tawh a, bill tlingkhawm hi cheng nuai 13 chuang niin, sawrkar atanga sum pek chhuah erawh a la awm lo.

Social Welfare Department hotute sawi danin tun dinhmunah MLA bial 27 atangin ruang phurhna bill 111 a lut tawh a, bill tlingkhawm chu Rs. 13,12,567 a tling tawh a, Bial 27 zingah Tuichang, Tawi, Hachhek leh Tuivawl ten Bill 10 theuh thehlut tawhin a thehlut tam ber an ni a, Tuichang Bial atanga Bill lut Rs. 1,34,090 chu ruang phurh man seng tam ber a ni bawk a ni.

Hetihlai hian ruang phurh man bill cheng nuai 13 chuang lut tawh mahse sum pekchhuah a la awm lo a, Social Welfare Department hotute sawi danin, ruang phurhna senso tur budget-a dah sa tawh cheng nuai 500, Finance Department-a an dil chu approve vek tawh a ni a, Technical thil thenkhat buaipui ngai a la awm avangin tun thlengin pekchhuah a la ni lo a, December thla chhung hian ruang phurh man diltute hian pawisa an dawn theih tawh beisei a nih thu Department hotute chuan an sawi a ni. Thudawn danin, sawrkarin ruang phurhna senso hi a la pekchhuah loh avangin Bialtu MLA te emawin ruang phurh man hi an lo pek sak rih mai a, sum pekchhuah theih a nih hunah a hnuah pek let leh mai tur a ni.