World AIDS Day-ah HIV chungchang inzirtir a ni

Nimin December 1, 2024 kha 'World AIDS Day' a ni a, he ni hi HIV chungchang zirhona leh a vei te chhawmdawl a tanpuina hun atan hman thin a ni.

World AIDS Day pual hian Presbyterian Church of India, Mizoram Synod hnuaia tualchhung Kohhran hrang hrangah chuan he ni pual thuchah, AIDS natna chungchanga mipuite hriat tur pawimawh leh zirtirna te chu chhiarchhuah a ni a, kumin-a World AIDS Day-ah hian thupui atan 'Kawng dik zawh' tih hmangin WHO in he ni hman dan tur a ruahman hrang hrang te tarlan a nih bakah Mizoram-ah AIDS natna a ziaawm zel theih nan leh a kai thar an awm belh loh nana inven dan pawimawhte leh hmalakna tur hrang hrangte Kohhran mipuite hriatah an tarlang bawk.

Mizoram State AIDS Control Society (MSACS) chhinchhiah danin, kum 1990 October atanga kumin August thleng khan Mizoram-ah HIV vei 31,461 hmuhchhuah an awm tawh a, HIV avanga thi mi 5,277 ni a chhinchhiah a ni. HIV kai tam ber za zela 91.23 te chu kum 15 atanga kum 49 inkar mi an ni a. HIV hrik kaina tam ber chu mipat hmeichhiatna atang niin za zela 63.93 an ni a. Ruihhlo a inchiu atanga kai za zela 30.80 leh nu leh pa atanga naute-a kaichhawn za zela 2.71 an awm a, a chhan sawi fak tur hriat loh za zela 1.47 an awm bawk. HIV/AIDS damdawi Antiretroviral Therapy (ART) la mi 16,661an awm mek bawk a ni.