District 2-ah Excise & Narcotics Station hawn a ni

Chief Minister Lalduhoma chuan nimin khan Saitual District leh Khawzawl District-ah Excise & Narcotics Station a hawng.

Nimin-a heng District pahnih-a Excise & Narcotics Station thar hawnna puala hun hman ah Chief Minister chuan ruihhlo dona atana hmun pawimawh ni turin Excise & Narcotics Station te chu hawn a ni tih sawiin, Sawrkar chuan ruihhlo do leh tih rem chu a ngai pawimawh takzet tih a sawi a. Ruihhlo do kawnga hnathawk turte pawh lak belh a nih theih nan Sawrkarin theihtawp a chhuah tih sawiin, khawtlang leh kohhran hruaitute pawhin ruihhlo do kawngah theihtawpa hma la zel tur leh Excise & Narcotics Department nen pawha thawhhona tha tak nei turin a chah bawk. Chief Minister chuan thailate'n ruihhlo leh a kaihhnawih thil vanga an tuar nasat em avangin a ngaih pawimawh thu sawiin, Jail leh Court te pawh hmachhawp tur a nih thu a sawi a, Home leh Jail atanga ruihhlo ngawlvei chhuak te an tluk leh tawh loh nana chhawmdawlna leh tanpuina pek an tum thu a sawi a. Heng Home a awm mek te'n eizawnna an neih theih nana inzirtirna pek an ngaihtuah mek thu leh Hand Holding Policy hnuaiah pawh heng ho hi ngaih pawimawh an tum thu a sawi bawk.

Chief Minister chuan Sawrkar hnathawkte chu sawrkar rawih an nih angin tangkai taka thawk chhuak tur an ni tih sawiin, Excise & Narcotics Department hnuaia thawktute zawng zawng chu ruihhlo laka fihlim tur leh thahnem ngai taka hnathawk turin a chah nghal bawk a ni.

Excise & Narcotics Minister Lalnghinglova Hmar pawhin heng District pahnih-a Excise & Narcotics Department-in hmun an nei ve thei ta chu lawmawm a tih thu sawiin, Mizoram sawrkarin ruihhlo hluar mek chu a ngai mawh tih a sawi a, Excise & Narcotics Department hnuaiah hnathawk turte la tharin Inspector te, Sub-Inspector te leh Post dang hrang hrang siam tawh niin siam belh zel tum a nih thu a sawi a, lirthei pawh 18 pek an ni tawh tih a sawi a. Ruihhlo tlemna ber District ni turin Kohhran leh khawtlang hruaitute leh sawrkar Department hotute chu Excise & Narcotics Department te tha taka thawhpui a, tangrual taka hma la turin a sawm bawk.

Excise & Narcotics Station hi Mizoram-a District thar pathum- Saitual, Khawzawl leh Hnahthial-ah te hawn a ni dawn a. Thawktu mi paruk theuha bul tan tur a niin Office in-charge tur dah an ni. Nimin a heng Excise & Narcotics Station thar hawnna hun hi Excise & Narcotics Department Secretary Lalramsanga Sailo IRS chuan kaihruaiin Commissioner, Excise & Narcotics Department Z. Lalhmangaiha chuan an Department hna kaldan te, an hmalakna te leh an mawhphurhna chungchang te a sawi bawk a ni.