Kumthar atangin Mizoram-ah Electric Smart Meter vuah hna thawh tan tum a ni

Power & Electricity Department chuan kumthar atangin Electric Smart Meter vuah tan an tum thu leh Mizoram pumah Prepaid Meter hmangin, a hniam berah Rs. 100/- atanga Top up theih a ni dawn tih P&E Minister F. Rodingliana chuan a sawi.

Nimin-a a Office-a thuthar thehdarhtute a kawmna ah P&E Minister F. Rodingliana chuan hun rei tak atanga hmalakna awm tawh Prepaid Metering chu a takin an hmang thei tawh dawn tih a sawi a, hei hian pawisa chawi a tam phah dawn chuanglo tih sawiin, dik taka mipuiten an Eng chhitman an pek theihna tura ruahman a nih thu leh Top up hmanga mahni duh zata recharge mai theih tura siam a nih thu a sawi a, Top up hman tura thla bituk zatah hman zawh nilo se a thlaleh atan an Top up chu a rin tlang theih dawn tih a sawi a. Mipui huapzo thei ang berin ngaihtuahna an sen thu leh a hniam bera recharge na atan Rs. 100/- an ruahman tih sawiin, a man hrang hrang a awm dawn thu leh dik zawka Eng chhit man mipuiten an chawi a beisei thu a sawi a ni.

P&E Minister chuan Electric Smart Meter vuah tur hian Company, AMISP (Advanced Metering Infrastructure Service Provider) te nen pawh inremna an nei tawh tih sawiin, anni lam chuan Meter hi fit nghal mai an duh tawh a, mahse Krismas leh Kumthar hman zawh hunah a vuah hna hi kalpui turin an tih ta zawk tih a sawi a. He hmalakna ah hian a vaiin Meter 2,92,081 vuah tum a nih thu sawiin, heng te hi Consumer Meter Singles Phase-ah 2,72,866 leh Three Phase-ah 16,517 bakah DT Meter 2300 leh Feeder Meter 398 te a nih thu sawiin, heng te hi sawrkar laipui in a rawn pawmpui zat niin a sawi a. Metre man chu tlemin a pung dawn tih sawiin, mipuite tana phurrit awmlo turin sawrkarin ngaihtuahna an seng tih a sawi bawk. Hei bakah hian P&E Minister chuan RDSS hnuaiah Aizawl khawpui chhunga Cable thlak vek tura ruahman a nih thu sawiin, hmun thuma thena hmun khat vel zawh anih tawh thu leh Bawngkawn atanga Kulikawn inkar Smart City kaltlangin Ban lian-a thlak vek tum anih thu a sawi bawk.

P&E Department chuan Smart Meter vuah avang hian Bill a san phah dawn lo tih sawiin, hman man dik taka chawi theihna tur a nih thu an sawi a. Distribution Transformer leh Sub-Station a 11kV Feeder-ah te Meter dah tel a nih dawn avangin a kar laka Power kalral a hriat tawh dawn a, Electric hman ruk te a tlem sawt tawh dawn niin an sawi a. Data entry sual, Meter Reading diklo leh thildang avanga Bill diklo te a bo tawh anga, heng avanga Consumer te’n Bill complaint nana hun tam tak khawhral fo thin chu a ziaawm tawh ang tih an sawi. Hei bakah hian a hun taka Bill dawn lohte, Bill siamsualte, Reader kalloh avanga a hnua Bill innghakkhawl thin te a awm tawh lo ang tih sawiin, “Bill pe tura thla tin intlar ngai a awm tawh lo ang. Pre-Paid a nih tawh dawn avang leh 24x7 Online Bill Payment a nih dawn avangin mahni Inlum/hmundang atangin eng hunah pawh mamawh tawk ang zel in kan Top up thei tawh dawn a ni. Bill Top up na tur a tlem ber (minimum) hi mipui tana harsa lo thei tur a ruahmanna siam a ni ang,” an ti.

Heng bakah hian mi zawng zawngin renchem tak leh tangkai taka power hman anih tawh dawn avangin leh dan dik lova power hmanruk te a awm tawh dawn loh avangin load a tlahniam deuh ang tih pawh sawiin, hei hian Transformer Overload leh thildang avanga buaina awm thin chu nasa takin a tih ziaawm beisei a nih thu leh Pre-Paid a nih tawh dawn avangin kan hman tur duhzat kan bituk theih dawn thu leh chu chuan power man-a sum kan sen a titlem bawk ang tih an sawi a ni.