AMC hnuaia hna lak ah mimal induhsakna uchuak a awm nia hriain MZP in sut leh an phut

Mizo Zirlai Pawl (MZP) chuan tunhnaia Aizawl Municipal Corporation (AMC) hnuaia hna lakah thil felhlel, mimal induhsakna uchuak a awm ngei nia an hriat thu sawiin, a rang thei ang bera suta dik taka hna la thin turin AMC hotute chu an ngen bawk.

MZP General Hqrs. hian nimin khan Extended OB Meeting neiin kumin September 11-a AMC Executive Council Meeting chuan an hnuaia hna hrang hrang Fixed Pay leh Contract Basis-a lak nise a tih thu sawiin, he Meeting thurel ang hian hna hrang hrangte hi Advertisement tel lovin, an mi duhsak zawng an la ngei nia a lan thu an sawi a. Thalai lehkhathiam hna zawng mek tam tak awm karah hetianga duhsak zawngte hnaa thun thawm hriat tur awm fo chu pawi an ti takzet tih sawiin, an dodal tlat thu an sawi bawk a ni.

MZP thuchhuah in a tarlan danin, AMC Executive Council Meeting hian Public Relations Officer pakhat (1), Project Assistant pahnih (2) leh Asst. Account Officer pakhat (1) te chu Fixed Pay a lak tura relin lak fel a ni tawh a. Heng bakah hian Consultat Geologist panga (5), Urban Animal Husbandry & Veterinary Officer pakhat (1) leh Junior Engineer pakhat (1) chu Contract basis a lak tura tih a ni bawk tih an sawi a. Heng hna hrang hrang, hlawh pawh tha tak takte hi a duh apiangte tana dil theih turin Advertisement chhuah a ni lova. MZP-in a chhui zelnaah phei chuan sawrkar phalna pawh an la lo nia hriat a ni bawk tih an sawi a. Chuvangin MZP General Hqrs. Extended OB Meeting chuan AMC hnuaia dik lo taka hna lak hi tunkar chhung ngeia sut turin AMC hotute chu an phut tih hi sawiin, an ngenna in awmzia a neih loh chuan zirlai hna zawng mekte thlavang hauh turin a theih ang angin hma an la dawn tih an tarlang a ni.

MZP chuan March ni 12, 2024 khan AMC hnuaia Geologist 3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeia hriain na taka an lo dodal tawh thu leh MZP ngenna angin kumin March 15-a AMC Executive Council Meeting chuan AMC hnuaia hna lak hrang hrangte sut (revoke) in March 18, 2024-ah sutna lehkha (order) tihchhuah a nih thu an sawi a. “He hna sut tawhte hi tunhnaiah tharthawh leh niin, a mi ngai thenkhatte thun nawn leh ngat an ni hian tu emaw duhsak zawngte hnaa thun theihna tura ruahman a ti rinhlelhawm hle a ni,” an ti. Nimin-a MZP Meeting hian sawrkar hna lakah a thiam leh tlingte chauh lak zel an duh thu pawh sawiin, “Mimal induhsakna hmanga hnalak hi kalpui tawh lo turin Sawrkar hnuaia Department hrang hrang leh Agency-te a ngen nawn leh a ni,” an ti bawk.