Armed Forces Flag Day pualin thuchah siam

Larsap Dr. Hari Babu Kambhampati chuan Financial year hmasa leh tun Financial Year kal mekah Mizoram sawrkar chuan indona avanga sipai boralta chhungte hnenah leh ramtuileilo-a chhuakte hnenah Rs. 12,50,000 a hlan tih a sawi.

Kumtin December ni 7-a India rampum a hman thin ‘Armed Forces Flag Day’ puala thuchah a siam ah he thu hi tarlangin Larsap chuan Mizoram Legislative Assembly pakuana ah Lt. Col. Clement Lalhmingthanga (R) leh  Petty Officer TBC. Lalvenchhunga (R), MLA ni mekte chu Armed Forces mi leh sa an nih thu a sawi a. Mizoram fa hrin, India ram tana an inpekna leh hnathawh that avanga huaisen lawmman leh chawimawina ngaihhlut hlawh tak tak dawngtute tarlangin, Naib Subedar Jeremy Lalrinnunga, Guard Regiment, Gold Medalist, Commonwealth Games 2022 chu Vishist Seva Medal hlan a nih thu te, Naik Lalhmangaihsanga Chinzah, 1st Assam Regiment leh Major Laldingngheta, Madras Regiment-te chu ralhmaah huaisen taka an chet avangin Sena Medal (Gallantry) hlan an nih thute bakah Sepoy H. Lalrokima, 12 Assam Regiment chu ral hmaah huaisen taka a chet avangin Mention-in-Despatch hlan a ni bawk tih a sawi.

Larsap chuan Financial year hmasa leh tun Financial Year kal mekah Ex-servicemen leh an chhungte mi 30 hnenah tanpuina Rs. 1,58,000 semchhuah a nih thu a sawi bawk a ni.