MSCI-ah Cancer inzaina leh ICU te hawn a ni

Mizoram State Cancer Institute (MSCI) Zembawk-ah nimin khan Cancer damlote tan inzai theihna ‘Surgical Services’ bultanna Operation Theatres Complex leh hemi ina ken tel damlo 7 dah theihna ICU te chu Health Minister Lalrinpuii’n a hawng.

MSCI Conference Hall-a hemi puala hun hman ah Health Minister chuan MSCI-ah inzai theihna, Surgery services leh ICU hawn a ni ta chu lawmawm a tih thu leh mipui harsa zawk tam tak, phai panna tur neilo ten nasa takin an chhawr tangkai thei dawn tih a sawi a, chu mai bakah Aizawl Civil Hopsital leh ZMC ah inzai ngai tam tak te chu hetah an inzai thei tawh dawn tih sawiin hemi vang hian heng damdawi In lian pahnih kan neih te hi a chhawk zangkhai thei dawn tih a sawi a. MSCI-ah Surgery Services hawn thei anih dan tlangpui te sawiin Minister chuan, Sawrkarin hei hi ngaipawimawhin mut mawh hnar mawh-ah neiin Cancer zai thei doctor MSCI a thawkte puibawm theitu nurse leh thawktu dangte dah belh a ni a, mahse hengte hi a tlem thei ang ber ‘bare minimum’ chauh a ni chungin Surgery Team din a nih hnuah hawn theih a nih tak thu a sawi a ni.

Health Minister chuan Mizoram-a hriselna ruhrel leh ruangam kan neih dan chungchang sawiin, PHC-ah te damlo admit an tlem hle a, mahse District Hospital te erawh mipuiin kan bawr hle thung tih a sawi a, hei vang hian Rural Health lamah chuan tha thawkhat mah ila Tertiary Sector lam, Specialist Sector lamah thung chuan Doctor leh tunlai hmanraw changkang lamah kan pachhe leh viau thung si niin a sawi a. Chuvangin District Hospital leh damdawi In lian te hi tihchangtlun zel leh thuamthat chu Sawrkarin a ngaipawimawh  thu a sawi a ni. ZMC-ah hian IVF te, Lung zaina Cardiothoracic Surgery te, Thluak zaina Neurosurgery te tan anih theih nan kawng te dap mek anih thu Minister hian a sawi bawk a. Health Services tihchangtlun nan CSR te hman tangkai leh dap zel a pawimawh thu sawiin, Company tam tak ten Health Sector atan an thawk chak thin a, hengte hi an dap zel a tul thu a sawi bawk.

MSCI-ah hian Cancer zai thei Doctor pathum (Gynane onco Surgeon, Onco Surgeon Superspecialist leh Head and Neck Onco Surgeon) an awm awm tawh a, anmahni puitu Anesthesiologist leh thawktu dang dah belhin Surgery Services hi tan a ni a, hemi in a mamawh leh kentel ICU khum 7 awmna pawh hawn nghal a ni. Operation Theatres Complex hnuaiah hian Major OT 2 leh Minor OT 1 a awm a. Hengte hi Sawrkar Laipui Scheme ‘Tertiary Cancer Care Centre’ scheme hnuaia din leh sak a ni.

MSCI-ah hian tun dinhmun ah Doctor 16 an thawk mek a, chung zing 13 chu nghet niin midang pathum chu Contractual NHM te an ni.