Scholarship dawng lo zirlai 7605 la awm niin sawi

Mizoram Scholarship Board hnuaia Scholarship dil zirlai 7,605-in tun thlengin Scholarship an la dawng lo niin Mizo Students’ Union (MSU) General Hqrs. hruaitute chuan an sawi.

Nimin-a Aizawl Press Club-a thuthar theh-darhtute an kawmna ah MSU hruaitute chuan Scholarship la dawng lo zingah hian Post Matric zirlai 5450 awmin Pre Matric-ah 1155 an awm thung niin an sawi a. Mizoram Scholarship Board Secretary Dr. PL Ramliana chu zirlaite’n Scholarship an dawn ngei theih nan Third installment cheng nuai 806 buaipuiin Delhi-ah a thang mek tih sawiin, an hmalaknaah lawmthu an sawi rualin an vil zui reng dawn tih an sawi bawk. 

MSU hruaitute chuan Scholarship Board te’n theihtawpa hma an lak laiin School thenkhat a Scholarship khawihtu, Institution Nodal Officer te inthlahdah avanga Zirlaite’n an Scholarship dil an dawng lo tur chu pawi an tih thu an sawi bawk a. Cherhlun Higher Secondary School (Adhoc)-a zirlai Scholarship dilte chu an School-in Verification an tihsak loh avangin kumin hian Scholarship an dawng thei dawn lo tih an sawi a. MSU chuan hei hi pawi an tih thu leh a thawktute an dem takzet thu bakah hrem ngai an awm a nih chuan a tul anga hremna lekkawh turin sawrkar thuneitute an ngen thu an sawi bawk.