Sinlung Hills Council sawrkar thar lakluh a ni

Sinlung Hills Council (SHC) Inthlanpui neih zawh taka thlantlin mi 12 te chu nimin khan lakluh niin sawrkar thar pawh siam nghal a ni bawk.

Sinlung Hills Council-a Member thlantlin te hi Aizawl Bawrhsap Pisapui Hall-ah Er. Lalhriatpuia Aizawl Bawrhsap kaihhruaina hnuaiah thu tiam tira lakluh an ni a, hemi hnu hian Protem Chairman Lalhmingthanga kaihhruaina hnuaiah Chairman leh Deputy Chairman thlanna neih nghal niin Tinghmun Bial atanga thlantlin R. Lalfakzuala chu Chairman atan thlantlin a ni a, Deputy Chairman atan Zohmun Bial atanga thlantlin Benjamin Lalrawnliana chu chuhtu awm lova thlantlin a ni bawk. Heng bakah hian Executive Council siam nghal niin Vanbawng Bial atanga thlantlin Ricky Lalremsanga chu Chief Executive Member (CEM) niin Executive Member atan Sakawrdai North Bialtu Melody Lalchhuangzeli; Ratu Bialtu Lalhmingthanga; Sakawrdai South Bialtu Lalhriatchhunga leh Saiphai Bialtu Zokhumthanga te an ni a. Nominated Member atan C. Lalnuntlanga (New Vervek) leh Ramfangzauva (Sakawrdai) te ruat an ni bawk.

Sinlung Hills Council-a Chief Executive Member (CEM) thar Ricky Lalremsanga chuan Akashvani zawhna chhangin Sinlung Hills Council mipuiten an beisei anga hmasawnna an thlensak theih nan theihtawp an chhuah dawn tih a sawi a. Mipuite hre renga hna thawh an tum tih sawiin, sum dinhmun enfel bakah hmasawnna tura hmalak chu an tih hmasak tur zinga mi a nih thu a sawi bawk. Tarlan tawh angin Sinlung Hills Council Inthlanpui-ah khan MNF in bial 5 an la a, an thawhpui HPC-R in bial 2 lain sawrkarna an siam thei a. ZPM in bial 4 la-in Congress in bial 1 an la a ni.