November thla chhunga Bana Kaih Scheme hnuaia dilna lutte chauh endik rih a ni dawn

Mizoram State Policy Coordination Committee chu nimin khan thukhawmin November thla chhunga Bana kaih Scheme hnuaia dilna lut te chauh endik rih a ni dawn.

Planning & Programme Implementation Department Committee Room-ah Mizoram State Policy Coordination Committee thutkhawm ah hian Bana Kaih Scheme hnuaia dilna lutte Implementing Department-ten an thlitfim hnu a sum mamawh zat zirchianna an nei a, he hunah hian Adviser to Chief Minister Dr. KC Lalmalsawmzauva chuan hlawhtlin tum a thiamna leh theihna nei, mi tumruhte kaih chhuahna tur ‘Bana Kaih Scheme’ thawhkhatna atan November thla chin a dilna lutte endik hmasak a nih tur thu a sawi a. Implementing Department-a Nodal Officer-ten uluk tak a dilnate an zirchian hnuah Apex Body chuan a endik leh tur thu a sawi bawk a ni. 

He thutkhawmna a tarlan anih danin Bana Kaih Schem-ah hian Implementing Department atangin dilna 8370 a lut tawh a, Implementing Department-a Nodal Officer leh Search Team ten zirchianna an kalpui tawh a. Commerce & Industries Department-ah dilna lut tam berin 3346 a lut a, Animal Husbandry & Veterinary Department-ah dilna 2758-a lut bawk a ni. Aizawl District atangin dilna 1741 lut tawhin District mal-a dilna lut tam ber a ni a, Lawngtlai District atangin 1413, Champhai District atangin 1228, Mamit District atangin 715, Kolasib District atangin 702, Siaha District atangin 667, Saitual District atangin 567, Lunglei District atangin 578, Serchhip District-ah 349, Khawzawl District-ah 326 leh Hnathial District atangin dilna 84 lut tawh anga chhinchhiah a ni a. Implementing Department hnuaia Nodal Officer leh Search Team-te endik hnuah nimin thleng khan Pilot Phase atana Apex Body-te ennawn leh turin dilna 190 thehluh a ni bawk.

He hunah hian Labour, Employment, Skill Development & Entrepreneurship (LESDE) Department leh Bana Kaih Scheme kalkawp theih dan turte, Pilot Phase atana Progress Partner thlanchhuah hma a Scheme kalpui dan tur zirchianna, Sensitization Program buatsaih dan turte leh Pilot Phase atana sum mamawh zat te sawiho a ni.