SEDP leh SASCI te pek chhan ang lo ah hmang niin sawi

MNF President leh Chief Minister hlui Zoramthanga chuan SEDP leh SASCI sum te chu a petute pek chhan ang lovin ZPM chuan an duh duh danin an hmang niin a sawi.

Aizawl East MNF Block Extended Meeting Inrinni-a neih a hmanpuina ah Chief Minister hlui leh MNF President Zoramthanga chuan, SASCI hna leh sum awmsa chu ZPM sawrkar thar chuan an ipte-ah an ak tawp ringawt a ni ber nia sawiin, “Sanction a nihna ang pawhin hmang loin vbc. 150 SEDP leh SASCI sum vbc. 230 te kha min petute min pek chhan ni lo, Sawrkar hnathawk hlawh ah te an pe ta ringawt mai a nih kha, Central in hnathawhna tura a sanction tawh, an duh duh dana a pawhsawih avangin Court emaw, Central emaw hian a guideline anga an tih loh vangin State sum in a rulh tir a nih chuan kan State hian sum lama kan hmachhawn tur hi a namai dawn lo hle a ni,” a ti a. Mipui ten ZPM Ministry chu an hrechiang chho ta hle nia sawiin, “Airport hralhna an zawng, ZMC hralh an tum leh bawk, thil dang te pawh thawm a awm chho zel, an mangang ve hle tih a hriat,” a ti bawk.

MNF thuchhuah in a tarlan danin he thutkhawm ah hian sawrkar in chhuanlam hrang hrang vanga LC/VC inthlan sawn hnaih an tum chungchang a lo in hmakhua dan tur leh Party kal zel dan tur leh hmalakna tur hrang hrang te an sawiho a ni.