Rate bituk aia hniama thlai hralh lo turin ruahman

Agriculture Minister PC. Vanlalruata’n Sawrkarin thlai chi 4 hralhna man a bituk aia hniama kuthnathawktuten an hralh loh nan ruahmanna siam vek tawh a nih thu a sawi.

Agriculture Minister chuan Sawhthing, Hmarcha, Aieng leh Hmunphiah man tur sawrkarin a bituk aia hniama kuthnathawktuten an hralh loh nan hma an lak thu sawiin, theihtawp chhuah a nih thu leh mipui hrilhhriatna pawh District tinah kalpui a ni tawh tih a sawi a, kuthnathawktuten an hriat tur pawimawh hrilhhriat zel an ni dawn tih a sawi bawk. Agriculture Minister chuan chuan thlai hralhna ah sawrkar inrawlh kher a ngai lo mai thei tih sawiin, kuthnathawktuten an thlai thar an hralhna turah hmalak a ni a, a man bithliah aia tlawm lova an hralh ngei theih nan sawrkar chuan ruahmanna a kalpui mek a, sawrkarin a man bithliah aia to a hralhna a awm anih chuan thlai hralhnaah sawrkar inrawlh a tul dawn lo niin a sawi bawk.

Agriculture Minister chuan kuthnathawktuten sawrkar rate aia tlawma thlai an hralh an remti dawn lo tih pawh sawiin, an rate aia tlawm baka hralhna a awmlo anih chuan sawrkar a inrawlh dawn tih a sawi a, sawrkarin Minimum Support Price a pe dawn tih sawiin, hemi atan hian sawrkarin pawisa a nei vek tawh a, sawrkarin thlai a lei a ngaih thulha thlai dahkhawmna tur pawh an ruahman sa tih a sawi bawk.