Handholding Scheme in remchang siam sak dawn

Chief Minister Lalduhoma chuan zirna-ah mitin kan hlawhtling vek thei lo tih sawiin, kawng danga thiamna leh theihna neite tan Handholding Scheme chuan remchang a siam sak dawn tih a sawi.

Chief Minister hian lehkha a zir thinna, Govt. Gandhi Memorial High School, Champhai in kum 75 a tlin lawmna lungphun chu Inrinni khan hawngin, zirlai te chu theihtawp chhuaha lehkha zir turin a chah a, Mizoram-a High School hlun ber pakhat, GM High School Champhai atanga a zirchhuak thei chu vannei a in tih thu sawiin, he zirna In atanga hlawhtling mi tam tak te hnungzui turin zirlaite a sawm a ni. Chief Minister chuan zirna ah mi zawng zawng an hlawhtling vek thei lo tih he hunah hian sawiin, zirlaite chu an zirna ah harsatna an lo tawk a nih pawhin beidawng mai lo turin a chah a, Pathian in kawng dangah theihna leh thiamna a pek te hmanga thawh tur dang tam tak an neih theih nan leh remchang siam sak turin sawrkar Flagship Scheme, Handholding a awm tih a sawi bawk a ni.

Chief Minister hian Govt. Gandhi Memorial High School kum 75 tlin lawmna lungphun a hawn hnu hian kum 1968-a din, High School Museum chu a tlawh a, he Museum hi Mizoram a hmasa ber niin hemi hnu hian School hmunhma fangin zirlaite a kawm nghal bawk a ni.

GM H/S Platinum Jubilee lawmna pui ber hi tunkar Ningani leh Zirtawpni khian neih a ni dawn a, he School-ah hian tun dinhmunah zirlai naupang 232, Teaching Staff 14 leh Non-Teaching Staff pakhat an awm mek a ni.