Buaina titawp tura hma la turin sawrkar in a phut

Zonuna Kawlni /

Kum khat leh a chanve vel tualchhung buaina an tawh avanga harsatna tawk mek Manipur sawrkar leh Central Sawrkar chu buaina titawp tura theihtawp chhuaha hma la chhunzawm turin Mizoram Sawrkar in a ngen.

Manipur tualchhung buaina chungchangah hian Inrinni khan thuchhuah siamin Mizoram sawrkar chuan tunhnaia buaina chhuak avanga hliam tuar leh nunna chan engemawzat an awm chu Mizoram Sawrkar chuan pawi a tih thu tartlangin, tunhnaia buaina avanga hliam tuar leh nunna chante leh an chhungte zawng zawng Mizoram Sawrkar chuan a tawrhpui takzet tih a sawi a, he buaina avang hian Manipur atangin Mizoram chhungah sahimna zawngin mi engemawzat an lut a, Mizoram Sawrkar leh mipui ten theihtawp chhuahin anmahni chhawmdawl hna an kalpui bawk a, buaina hi a tawp theih nan hmalak thuai nise a ti a ni.

Tunhnaia Manipur buaina kaihhnawihah tumahin Mizoram chhunga hnam leh hnam inhmelmakna tichhuak thei tur zawnga hma la lo turin Mizoram Sawrkar-in mitin te a ngen bawk a. Mizoram chhunga hnamdang, a bik takin Manipur State a mi te himna turin Mizoram sawrkar chuan hma a la zel dawn a. Chutiang bawkin Mizoram pawna cheng Mizote, a bik takin Manipur-a zirlaite leh hna thawka awm te himna turin Mizoram Sawrkar chuan hma a la chhunzawm zel dawn a ni, a ti.

Hetihlai hian, Mizo Zirlai Pawl (MZP) chuan Manipur sawrkarin an State chhunga Meitei firfiakte a khuahkhirh theih hma chu an State-a Science leh Technical Institution hrang hranga Mizoram Seat-te chu Institution dangah beh tir turin sawrkar laipui an phut tih an sawi a, MZP chuan Manipur State khawpui Imphal-a Mizoram atanga lehkha zir a awmte'n Meitei kut an tawrh loh nana hma la turin Sawrkar laipui an phut tih an thuchhuah ah an tarlang a ni.

Hetihlai vek hian Manipur State Jiribam-a CRPF ten an kahhlum ni a sawi, Zohnahthlak mi 10 te ruang chu Silchar Medical College atangin Inrinni chawhnu lam khan sawrkar laipui ruahmanna in Lamka phurh thlen an ni a, vuina hun hman dan tur ruahmanna siamfel a la ni rih lo a ni. 

Comments

Post a Comment

Popular News (Last 30 Days)

FG&CC Counsellor dahnghet

Zonuna Kawlni /
Image
Mizoram Synod in Serchhip-a Family Guidance & Counselling Centre (FG&CC) a kalpui meka Counsellor tura ruat Rev. Jonathan Pachuau dahnghehna hun chu nimin khan Serchhip Kawnpui Kohhran Committee Room No. 2-ah neih a ni a, FG&CC Director Rev. Lalthangpuia Fanai chuan Counsellor thar hi dahnghetin Rev. Zai-remkima chuan tawngtai sakna hun a hmang bawk a ni. Rev. Jonathan Pachuau hi Counselling ah term hnih a awm hnuin Biate Pastor Bial enkawl tura dah a ni a, tunah hian Serchhip-a FG&CC ah dah leh niin Rev. Rolungmuana Zadeng chu a thlak a ni.
Kimchang zawkin »

Chhingchhip-ah Heroin man

Zonuna Kawlni /
Image
Inrinni kalta zing dar 3:00 vel khan Serchhip Police, CID (Special Branch) leh Serchhip Sub-Hqrs. YMA Anti-Drug Squad te chuan Chhingchhip Venglai-a Vanlalchhuma te In ah Heroin nia hriat Hawng hnih an man a, In neitu Vanlalchhuma (59) leh a mikhual Thanliana (33), Falam (Myamar) nia insawi, tuna Aizawl Falkland Veng nia insawi pawh manin thubuai siam sak nghal an ni. Tun tuma Heroin an man hi gram 23.73 a rit niin hemi chungchang hi chhui zui mek a ni.
Kimchang zawkin »